ዬ ማጻፋ 62 - Geeshsha Maxaafa

Dawiti Zammareta Kaabbo Edotaanes Yexxida Mazamure

¹ Ta shemppoya Xoossan xalla shemppo demmawus; taas atoteththi izappe yees.

² Izi xalla taas zaallanne tana ashshizayssa; ta qotetta attizaso gidida gishshas mulekka hirgike.

³ Cimmidi kundana matida goda malanne musida lasha mala wolqqay baynda as dhayssanawu sugishe awude gakkanaas de7andetii?

⁴ Istti iza bonchcho sohoppe kawushshanaas xalla koyeettes; istti wordon ufayetteettes; bantta doonan anjjeettes; gido attiin bantta wozinan qanggeettes.

⁵ Ta shemppoyee! Woppu gaada Xoossa xalla naaga; taas hidotay izappe yaana.

⁶ Izi xalla taas zaallanne tana ashshizayssa; ta qotetta attizaso gidida gishshas mulekka hirgike.

⁷ Taas atoteththinne bonchchoy beettiday Xoossafe; izi ta qotetta attizasonne taas mino zaalla.

⁸ Asoo! Ubbaa wode Xoossan ammanettite; izi nuus qotetti attizaso gidida gishshas intte wozina qofa izas yootite.

⁹ Bonchchosoppe yeleteththi maaddenna; kadhettidasoppe yeleteththika ubbay hada. Istti meezaane denththontta carko mala; istti issi bolla carko mala kawushsha.

¹⁰ Bonqqan ammanettofte; kaysi shiishshida dureteththan hidota ooththofte. Inttes dureteththi darikkoka intte wozina iza bolla woththofte.

¹¹ Xoossay issito haasaydes; tani nam7u yo7ota siyadis; heytikka, «Wolqqay Xoossassa;

¹² mernaa siiqoy Xoossassa.» Abeet Godawu! Neni as ubbaas iza ooso ooso mala immana.