ዬ ማጻፋ 6 - Geeshsha Maxaafa

Dawiti Zammareta Kaabbos Osppun Shayan Waaxettida Diiththan Yexxida Mazamure

¹ Abeet GODAWU! Yiillon tana seeroppa; woykko ne hanqon tana qaxxayoppa.

² Abeet GODAWU! Tani daaburanchcha gidida gishshas tana maara. Abeet GODAWU! Ta wozinay madunxida gishshas tana paththa.

³ Ta shemppoya keeha un7ettadus; histtiin GODAWU! Tana maaddanaas neni awude gakkanaas gam7anee?

⁴ Abeet GODAWU! Neni simmada tana ashsha; ne maaroteththa daron tana kessa ekka.

⁵ Hayqqida asi ooninne nena qoppenna; duufon nena galatizay deenna.

⁶ Ta ceecen xalla daaburadis; omars omars tani yeekkashe ta hiixa caphisays; ta borkoththaaka ta afunththan musissays.

⁷ Ta ayfeti daro afunxxida gishshas daaburda; ta morkketa ubbaa gaasonkka demo ixxida.

⁸ GODAY tani yeekkiza yeeho siyida gishshas, intteno iita ooththiza ubbatoo! Taappe haakkite.

⁹ GODAY ta shoobeththaa be7ides; ta woosaakka siyides.

¹⁰ Ta morkke ubbati yeellatananne dagammana; qoppontta kawuyidi guye simmana.