ዬ ማጻፋ 59 - Geeshsha Maxaafa

Sa7ooli Dawite wodhanaas kiittida asati iza keeththaa dooddi uttida wode Dawiti zammareta kaabbos, «Dhayssofa» geetettiza diiththa giigson shiishshida woosa mazamure

¹ Abeet ta Xoossawu! Ta morkketappe tana ashsha; ta bolla dendizaytappe tana naaga.

² Iita ooththizaytappe tana maadda; suuth gussiza asatappe tana ashsha.

³ Abeet GODAWU! Istti tana wodhanawu zamadidi naagizayssa be7a! menxe iita asati tani mooronne nagara ooththontta dishin ta bolla duulateettes.

⁴ Aykko mooro ta ooththontta dishin tana dhayssanaas giigettida; hayssa neni be7ada tana maaddana denda.

⁵ Abeet GODAWU! Ubbaafe Wolqqama Xoossawu! Neni Isra7eele Xoossa; kawoteththata ubbaa qaxxayanaas ne beegga; makkalla ooththizayta maaroppa.

⁶ Istti kana mala hoskkattishe katama giddon yuuyi pe7idi omars simmana.

⁷ Istta doonappe kezizayssa siyite! istta inxarsay mashsha mala; istti, «Oonee nuna siyanay?» gi qoppeettes.

⁸ Gido attiin abeet GODAWU! Neni istta bolla miiccaasa; kawoteththata ubbaa kadhaasa.

⁹ Ta Xoossawu! Ne taas miixa gidida gishshas ta nenan ammanettays.

¹⁰ Ta Xoossay ba mernaa siiqon tanara gayttana; ta morkketa kundeth izi tana bessana.

¹¹ Abeet nuus gondalle gidida Godawu! Ta asay neni halo kessizayssa balontta mala neni istta wodha dhayssofa; gido attiin ne wolqqan istta laallanne kawushsha.

¹² Istti bantta doonappe kessiza nagara gishshas, bantta inxarsaa qaala gishshas, istti qanggida qanggeththa gishshassinne wordotiza gishshas bantta otoreteththan oyketetto.

¹³ Ne hanqon istta dhayssa; istta mulera dippi histta; he wode Xoossi Yaaqoobe zereththa ayssizaadenne sa7a gaxa gakkanaas diza deraa haarizaade gididayssa asi ubbay erana.

¹⁴ Istti kana mala hoskkattishe katama giddon yuuyi pe7idi omars simmana.

¹⁵ Istti miza miish hasishe yuuyeettes; kallontta aggiko kana mala laweettes.

¹⁶ Gido attiin tani ne wolqqa sabbana; maalado maalado ne mernaa siiqo gishshas yexxana. Neni taas meto gallas zempponne baqata attiza miixa.

¹⁷ Abeet Xoossawu! Ta wolqqay nena; ne taas miixa; ne mernaa siiqon tana siiqaasa; hessa gishshas galata yeththan ta nena sabbana.