ዬ ማጻፋ 58 - Geeshsha Maxaafa

Dawiti zammareta kaabbos, «Dhayssofa» geetettiza diiththa giigson shiishshida woosa mazamure

¹ Intteno dere haarizaytoo! Addaka intte doonappe xillo haasayay kezizee? Asa ubbaas xillo pirdeetii?

² Akkay! Intte wozinan iita miish halchcheeta; intte kushey biitta bolla makkalla ooso ooththees.

³ Iitati ba aayi uloppe doommidi mooro oge beettes; yelettida gallassafe doommidi baletteettessinne wordoteettes.

⁴ Istti shooshsha mala marzera deettes; tulle goppe shooshsha mala ba hayth tulliseettes.

⁵ Muurennizayssi ay mala cincca gidikkoka goppe shooshshi iza cenggurssaa siyenna.

⁶ Abeet Xoossawu! Istta achchaa menththa; abeet GODAWU! Gaammota banqila menththa.

⁷ Istti gukkiza haaththa mala dhayetto; istti dukkiza wondafe yiishshay dun7o.

⁸ Istti bishe muushiza dhaadhdhe mala gidetto; poo7o be7ontta awucaya yelettida naa mala gidetto.

⁹ Agunththa tamay oto suulisontta dhayza mala nagaranchchata ne eeson dhayssa.

¹⁰ Nagaranchchata bolla halo kessizayssa be7idi xilloti ufayettana. Iitata suuththan ba toho meecettana.

¹¹ He wode asay, «Addaka xilloti ooththida lo7o oosos woytoy dees; tumukka sa7a bolla pirdiza Xoossi dees» gaana.