ዬ ማጻፋ 57 - Geeshsha Maxaafa

Dawiti Sa7oole sinththafe baqatidi gongolo giddon dishe zammareta kaabbos, «Dhayssofa» geetettiza diiththa giigson shiishshida woosa mazamure

¹ Abeet Xoossawu! Ne taas qadhetta; tana maara; ta shemppoya nenan zemppadus; bashshay aadhdhana gakkanaas tani ne qefeta garsan qotettana.

² Izi ba halchcho mala taas poliza Ubbaafe Dhoqqa Xoossako waassays.

³ Xoossi saloppe maado kiittidi tana ashshana; tana yedhdhizayta kawushshana; Xoossi ba mernaa siiqonne ba tumateththaa taas kiittana.

⁴ Tani ta morkketa giddon, as puuzidi miza gaammo misatizayta giddon days. Istta achchay tooranne wondafe yiishshaa mala; istta inxarsayka qara mashsha mala.

⁵ Abeet Xoossawu! Neni salotappe bollara dhoqqu dhoqqu ga; ne bonchchoy sa7a ubbaa kumo.

⁶ Istti ta tohos woximade woththida; ta asateththaa kuunissida; istti ta ogen olla bookkida; gido attiin he ollan banttas kundida.

⁷ Ta wozinay minni dees; abeet Xoossawu! Ta wozinay minnidi dees; tani nees yexxananne nena sabbana.

⁸ Ta shemppoyee birkka! Diiththatinne maasinqoti beeggite! Tanikka wonttara dendana.

⁹ Abeet Godawu, tani nena asa ubbaa sinththan galatana; qasse deraa giddon ta nena yeththan sabbana.

¹⁰ Ne mernaa siiqoy pude salo gakkides; ne tumateththayka salo shaara gakkides.

¹¹ Abeet Xoossawu! Neni salotappe bollara dhoqqu dhoqqu ga; ne bonchchoy sa7a ubbaa kumo.