ዬ ማጻፋ 56 - Geeshsha Maxaafa

Filisxeeme asay Geete kataman Dawite oykkida wode Dawiti zammareta kaabbos yexxida mazamure; «Haahoson diza wola bolla uttida haraphpheyo» geetettiza diiththa giigson shiiqida woosa.

¹ Abeet Xoossawu! Asay tana un7eththees; ta morkketi tana ubba wode yedeththeettes; hessa gishshas ne taas qadhetta.

² Ta morkketi ubbaa gallas tana yedeththeettes; daroti otoreteththan tana oleettes.

³ Tana babisiza wode ta nenan ammanettays.

⁴ Tani Xoossan ammanettiza gishshas babbike; izi immida hidota qaala gishshassika iza galatays; ta Xoossan ammanettays; asi tana ay ooththanee?

⁵ Ubbaa gallas ta morkketi taappe mooro demmanaas woxxeettes; istti ubba wode tana qohanaas zoretteettes.

⁶ Shiiqidi ta bolla maqetteettes; zamadi uttidi tana kaaletteettessinne ta geedon eqqetteettes; tana wodhanaaska koyeettes.

⁷ Xoossoo! Istta iitateththaa gishshas istta yeddofa; he kawoteththata ne hanqon kawushsha.

⁸ Neni ta yeeho beyadasa; ta afunththaa makkadasa; ubbatikka ne mazgaban xaafettida.

⁹ Tani nena xeygiza wode ta morkketi guye simmeettes; Xoossi tanara dizayssa tani hessan erays.

¹⁰ Ta iza qaala galatiza Xoossan, ta iza qaala sabbiza GODAAN,

¹¹ tani he Xoossan ammanettiza gishshas babbike; asi tana ay ooththanee?

¹² Abeet Xoossawu! Tani nees adina adinettadis; ta adinettoyssa galata yarsho nees gaththana.

¹³ Neni ta shemppoyo hayqoppe ta tohota dhupheppe ashshadasa. Hessa gishshas izi shemppora paxa dizaytas poo7isiza poo7on Xoossa sinththan ta simerettana.