ዬ ማጻፋ 55 - Geeshsha Maxaafa

Dawiti Hassa7an Shiishshida Ginxo; Dawiti Zammareta Kaabbos Diiththan Yexxida Mazamure

¹ Abeet Xoossawu! Ta woosa siya; ta shoobbishin qelli gooppa.

² Ezga; ta woosa siya; ta qofan ta un7ettadis; maracey taas kokkorides.

³ Ta morkketi mandiin hirgadis; iita asati qohiin dagammadis; istti ta bolla meto ehida; hanqon dendidi tana morkkida.

⁴ Ta wozinay hirgees; hayqqanaakkonne giza dagamay ta bolla wodhdhides.

⁵ Yashshinne dagamay tana oykkides; ta asateththay kokkorides.

⁶ Tani, «Taas haraphphe mala qefey dizaakko piradhdha baada shempana.

⁷ Tani beta baadakka bazzon de7ana shin.

⁸ Tani goteppenne uushoppe attizaso eesotada gakkana shin» gadis.

⁹ Abeet Godawu! Tani katamay giddon ooshshinne gene beyadis; iitata zore ne dhayssa; istta qofaakka bulakereththa yegga.

¹⁰ Iitati gallassinne qamma katama gimbeza bollara yuuyeettes; iitateththinne geney izi giddon dees.

¹¹ Bashshi izi giddon dees; geneynne cimoy izi dubbushatappe shaakettenna.

¹² Ta morkkey tana cayidaakko ta iza dandaya aaththanakko, ta bolla ceeqettizay tana ixxizaade gididaakko tani izappe qotettana.

¹³ Gido attiin hayssa ubbaa ta bolla ooththizay nena, ta laggeza, ta dabbozanne ta siiqoza.

¹⁴ Nuni issoy issaara ufayssan haasayettidos; issifekka Xoossa soon simerettidos.

¹⁵ Iitateththi istta wozina giddon diza gishshas ta morkketa bolla qoppontta hayqoy gakko; shemppora paxa dishe moogettetto!

¹⁶ Tani gidikko ta Xoossa xeygays; GODAY tana ashshees.

¹⁷ Maalado, gallassinne omars tani waassayssinne ta meto izas yootays; izi ta qaala siyees.

¹⁸ Daroti tana eqettikokka, izi tana ola tooraappe ashshees.

¹⁹ Beniisofe kawoteththa araatan utti diza Xoossay ta woosa siyidi ba oge laammonttaytanne Xoossas yayyonttayta kawushshana.

²⁰ Ta laggezi ba siiqota bolla ba kushe denththides; isttara caaqettida caaqo qaalaakka laallides.

²¹ Iza doonappe keziza qaalay oyssa mala; gido attiin iza wozinay caddiza toora mala; iza qaalati zaytepekka aadhdhi shugo; gido attiin qanxxiza mashsha mala.

²² Ne meto GODAA bolla woththa; izi nena minththi naagana; izi xilloti kundana mala ooththenna.

²³ Abeet Xoossawu! Neni gidikko iitata duge ciimma ollan yeggana. Suuth gussizaytinne baleththizayti ba daana layththas baggaka deettenna; gido attiin tani nenan ammanettays.