ዬ ማጻፋ 54 - Geeshsha Maxaafa

Ziife asay Sa7oolekko biidi, «Dawiti nu biittan qotetti uttides» gi yootiin Dawiti zammareta kaabbos diiththan yexxida mazamure

¹ Abeet Xoossawu! Ne sunththan tana ashsha; ne wolqqan taas pirda.

² Abeet Xoossawu! Ta woosa siya; ta haasayza qaala ezga.

³ Otoranchchati ta bolla dendida; genanchchati tana wodhanaas koyeettes. Xoossaa wudu geettenna.

⁴ Gido attiin Xoossi taas maado; Godaykka taas zemppo.

⁵ Abeet Xoossawu! Ta morkketas istta iitateththaa mala isttas zaara. Ne ammaneteththan ne istta dhayssa.

⁶ Abeet GODAWU! Tani ta dosan nees yarshana; nees bessiza gishshas tani ne sunththaa galatana.

⁷ Ays giikko neni tana ta meto ubbaafe ashshadasa; ta morkketi kundishin ta ayfen beyadis.