ዬ ማጻፋ 52 - Geeshsha Maxaafa

Eedoome biitta as Doyqey Sa7oolekko biidi, «Dawiti Abimelekke soo bides» gidi yooti simmiin Dawiti zammareta kaabbos hassa7an shiishshida ginxo

¹ Haysso wolqqamazoo! Xoossi nena kadhichides; ne ays iita ooson nashettay? Ays ubbaa gallas ceeqettay?

² Nenoo baleththon kumida genanchchawu! harata dhayssana qaxxaasa! Ne inxarsayka qara magalla mala.

³ Neni lo7o aggada iita siiqaasa; tuma haasayanaappe wordo haasaya dosaasa.

⁴ Nenoo baleththon kumida wordanchchazoo! Neni as madunththiza qaala siiqaasa.

⁵ Gido attiin Xoossi nena mernaas dhayssana; izi nena ne keeththafe buuci kessana; paxa dizayta giddofekka dhoqalli diggana.

⁶ Xilloti hayssa be7idi yayyana; istti iza bolla hizgi miiccana;

⁷ «Xoossa baas zemppo ooththonttaade, ba dureteththa daron ammanettizaade ba iita ooson minnizaade hayssa be7ite!» gaana.

⁸ Gido attiin aaciza wogara miththa mala tani Xoossa Keeththan aacays; iza mernaa siiqon tani meri mernaas ammanettays.

⁹ Neni ooththida ubbaas tani nena mernaas galatays; ne lo7o gidida gishshas ta ne sunththan hidota ooththays; tani Xoossa deraa sinththan ne kiyateththaa sabbana.