ዬ ማጻፋ 51 - Geeshsha Maxaafa

Kawo Dawiti laymatidaappe guye nabe Naataaney izakko yida wode Dawiti zammareta kaabbos yexxida mazamure

¹ Abeet Xoossawu! Ne mernaa siiqoza mala tana maara; ne qadheta daron ta mooroza qucca.

² Ta iitateththa ubbaa taappe meecca; ta nagarappeka tana geeshsha.

³ Tani ta mooroza erays; ta nagaraykka ubbato ta sinththana.

⁴ Ta nena xalla qohadis; qasseka ne sinththan iita ooththadis. Hessa gishshas ne qaxxayda qixaaten, ne ta bolla pirdida pirdankka ne xillo

⁵ Tani ta aayi uloppe doommada nagaranchcha; yelettoosofe haa simmadakka ta mooranchcha.

⁶ Hekko neni asa wozinappe tuma koyaasa; hessa gishshas ta giddo asateththaa ne aadho erateth tamaarsa.

⁷ Hisophphe bonccon neni tana pistta; tani geeyana; tana meecca; tani shachchafe aadhdhada booxxana.

⁸ Neni tana ufayssinne hashshu giissiza miish sissa; ne menththereththida ta meqeththatakka paththa.

⁹ Ne sinth ta nagarappe haraso zaara; ta qoho ubbaaka qucca digga.

¹⁰ Abeet Xoossawu! Ne taas geeshsha wozina medhdha; mino ayana ta giddon woththa.

¹¹ Tana ne sinththafe oloppa; ne Geeshsha Ayana taappe ekkofa.

¹² Ne atoteththaa ufayssaa taas zaarada imma; eeno giissiza ayanan ne tana kunththa.

¹³ Histtiko tani mooranchchata ne oge tamaarsana; he nagaranchchatikka neekko simmana.

¹⁴ Abeet Xoossawu, tana ashshiza Xoossawu! Tani shemppo wodhontta mala tana maadda; ta inxarsayka ne xilloteththa gishshas ililisan yexxo.

¹⁵ Abeet Godawu! Ta doona doya; histtiko ta inxarsay nena galatana.

¹⁶ Neni yarshon ufayettizaakko ta nees yarsho shiishshana; ne gidikko yarshon ufayettaka; xuugettiza yarsho yarshikokka neni ufayettaka.

¹⁷ Xoossas shiiqiza yarshoy ashke ayana; abeet Xoossawu! Meqqida wozina ne kadhakka.

¹⁸ Abeet Xoossawu! Ne dosan Xiyoono duresa; Yerusalaame gimbeta gimba.

¹⁹ He wode xilloteththa yarshoninne wuri xuugettiza yarshon neni ufayettana; kormatikka ne yarshizason yarshettana.