ዬ ማጻፋ 50 - Geeshsha Maxaafa

Aasaafe Mazamure

¹ Wolqqama GODAY, Xoossay haasayees; Arshey mokkizasoppe wullizaso gakkanaas sa7an diza asaa xeygees.

² Mulera lo7o gidida Xiyoonippe Xoossi poo7isees.

³ Nu Xoossi yaana; izi co7u geenna. Miza tamay iza sinththana; wolqqama gotey iza yuushonna.

⁴ Xoossi ba asaa pirdanaas salonne sa7a xeygees.

⁵ «Tanara yarshon caaqettida geeshshata taakko shiishshite» gees.

⁶ Xoossi barkka pirdiza Xoossa gidida gishshas saloti iza xilloteththa awajjeettes.

⁷ «Ta asazoo ne siya! Tani nees yootays; Isra7eele asawu! Tani ne bolla markkattays. Tani Xoossay ne Xoossa.

⁸ Ne yarsho gishshassinne neni ubbato shiishshiza xuugettiza yarsho gishshas tani nena borikke.

⁹ Hessa malakka ne dirsafe kormata, woykko ne xarphphafe deyshata ekkanawu koykke.

¹⁰ Woran diza do7a ubbati taassa; shii zumata bollan diza mehetikka tayta.

¹¹ Tani zumata bolla diza kafota ubbaa erays; demban diza medheteththati ubbay tayta.

¹² Salo gufanththon diza ubbay taassa; hessa gishshas ta gafikkoka nees yootikke.

¹³ Tani kormata asho miikke; Woykko deyshata suuth uyikke.

¹⁴ Xoossas galata yarsho shiishsha; ne adina Ubbaafe Dhoqqa Xoossas gaththa.

¹⁵ Meto gallas ne tana xeyga; ta nena ashshana; nekka tana bonchchana» gees.

¹⁶ Gido attiin Xoossi nagaranchchas, «Ta woga neni zaara zaarada biddanaas woykko ta caaqo qaala ne yootanaas nees ay maatay dizee?

¹⁷ Ne ta seera ixxaasa; ta qaalatakka kadhaasa.

¹⁸ Neni kayso be7ida wode izara dabbotadasa; laymatizayta maabarankka zuppetaasa.

¹⁹ Neni ne doona iita haasayanaas doyadasa; ne haasayza haasayay wordo xalla.

²⁰ Aadhdhooson aadhdhooson ne ishaa zigiraasa; ne aayi naa sunththika mooraasa.

²¹ Neni hayssa ubbaa ooththiza wode tani co7u gadis; hessa gishshas neni tana ne mala gaada qoppadasa; gido attiin ha7i tani nena walassays; qasseka ta nena qonccen seerays.

²² «Intteno Xoossa dogizaytoo! Hayssa akeekite; intte ixxis giikko tani inttena menththereththana; he wode inttena oonikka ashshenna.

²³ Taas galata immiza asi tana bonchchees. Suure ogera biza as tani atoteththaa bessana» gees.