ዬ ማጻፋ 5 - Geeshsha Maxaafa

Dawiti Zammareta Kaabbos Susul7en Yexxida Mazamure

¹ Abeet GODAWU! Tani yootizayssa ezga; ta un7on woossiza woosaakka siya.

² Ta kawozo Xoossoo! Ta nena woossiza gishshas tana maadda gaada ta waassiza waaso ne siya.

³ Abeet GODAWU! Maalado maalado guuran neni ta qaala siyaasa. Maalado maalado guuran tani ta woosa ne sinth shiishshada, neni taas immiza zaaro ekkana gaada naagays.

⁴ Neni iitateththan ufayettontta Xoossa; iitati nenara de7ettenna.

⁵ Ceeqettizayti ne sinththan eqqettenna; iita miish ooththiza ubbata neni ixxaasa.

⁶ Wordo haasayzayta neni dhayssaasa. Suuth gussizaytanne cimmiza asata neni harasettaasa.

⁷ Gido attiin tani ne maaro daron ne keeththa gelana. Ne geeshsha Keeththaako simmada bonchchoninne yashshateththan nees goynnana.

⁸ Abeet GODAWU! Ta morkketappe ne tana ashsha; tana ne xilloteththankka kaaleththa; ne oge ta sinththan suurisa.

⁹ Istta doonappe keziza qaalay tumu gidenna. Istta wozinankka geney kumides; istta doonay doyettida duufo mala; istti bantta inxarsan as cimmeettes.

¹⁰ Abeet Xoossoo! Istta bolla neni pirda; istta geney istta ekki bo. Istta nagaray daro; hessa gishshas neni istta goodda digga; ays giikko istti ne bolla geellattida.

¹¹ Gido attiin nenan zemppida ubbati ufayetetto; istti mernaas ufayssan yexxetto. Ne sunththa siiqiza ubbati ufayetetto; isttika nenan naagettetto.

¹² Abeet GODAWU! Neni xillota anjjaasa; Neni gondallen kammiza mala ne kiyateththan istta kammaasa.