ዬ ማጻፋ 49 - Geeshsha Maxaafa

Qoore Nayti Zammareta Kaabbos Yexxida Mazamure

¹ Derezoo, intte ubbatikka hayssa siyite! Intteno sa7a bolla diza ubbatoo! Hayssa ezgite.

² Dhoqqaynne ziqqay, dureynne manqoyka siyite.

³ Ta wozina qofay akeeka immees; Ta doonay aadho erateththa qaala haasayees;

⁴ Tani ta hayth leemisotakko zaarana; istta birsheththaaka ta diiththan qonccisana.

⁵ Meto gallassi yiza wodenne iitateththan tana labizayti dooddi uttiko ta ays babboo?

⁶ Ba aqotan ammanettizaytassinne ba dureteththa daron ceeqettizaytas ta ays babboo?

⁷ Asi barkka bana wozzenna; woykko ba shemppo gishshas Xoossas waaga qanxxanaas dandayenna.

⁸ Asa shemppo waagay keehippe al7o; shemppo duuththiza waagay mulekka deenna.

⁹ Ay waaga qanxxiinkka izi mernaas de7ana mala, woykko izi hayqqontta mala ooththanawu dandayenna.

¹⁰ Eeyatinne dammati hayqqiza mala aadho eranchchatikka hayqqana; ubbayka ba aqota haras yeggi baana; hessa ubbayka be7ana.

¹¹ Daro gade istti ba sunththan haarikkoka isttas mernaa keeththay duufo; izikka isttas yeletappe yeleta gakkanawu duussaso gidana.

¹² Asi ay duretikkoka ba dureteththaara kanththenna; izi do7a mala hayqqana.

¹³ Banan ammanettiza eeyata qaadaynne istta qaala kaallizayta wurseththa saamay hayssa.

¹⁴ Shukas qorettida dorsata mala istti duufos doorettida; hayqoy istta heenththanchcha gidana; istti bantta yalliso keeththafe haakkidi duufon musana. Suure asati maaladora istta duufo bollara simerettana.

¹⁵ Gido attiin Xoossi ta shemppo wozzana; izi tana hayqo wolqqafe ashshi ekkana.

¹⁶ Asi duretiza wodenne iza aqotay dari dari biza wode izaades yayyofa.

¹⁷ Gaasoykka izi hayqqishe aykkoka ekkidi beenna; iza aqotay izara issife duufon gelenna.

¹⁸ Asi paxa diza woden, «Taas kumides» giikkoka, ubbay izas giigida gishshas galatettikokka,

¹⁹ simmidi mulekka poo7o be7onttaso ba aawata maabaran gayttees.

²⁰ Asi erateththi baynda ay duretikkoka izi do7a mala hayqqana.