ዬ ማጻፋ 48 - Geeshsha Maxaafa

Qoore Nayta Mazamure

¹ GODAY gita; nu Xoossa kataman geeshsha zumazan gita galatay izas bessees.

² Biitta ubbaas ufays gididay, pudeha baggara beettizay dhoqqanne lo7o gidida Xiyoone zumay wogga kawoza katama.

³ He katamaa gimbeza giddon, izi katamays ashshiza miixa gididayssa bessides.

⁴ Kawoti bantta tooranchchatara issife shiiqida; histtidi Xiyoono olanawu yida.

⁵ Gido attiin izo be7idi malalettida; dagammidi guye baqatida.

⁶ Istti hessan de7ishin istta yashsha kokkorisi oykkides; miixay oykkida maccassa mala miixattida.

⁷ Arshey mokkizaso bagga wolqqama carkon meqqiza Tarseese markabeta mala istta kokkorisadasa.

⁸ Nuni siyida malakka, Ubbaafe Wolqqama GODAA kataman, nu Xoossa kataman izi ooththidayssa nu be7idos. Xoossi he katamaa mernaas minththi essana.

⁹ Abeet Xoossawu, ne Keeththa giddon ne mernaa siiqo qoppoos.

¹⁰ Abeet Xoossawu, ne sunththa malakka ne galatay sa7a gaxa gakkides; ne ushachcha kushey xilloteththan kumides.

¹¹ Ne pirda gishshas, Xiyoone asay ufayettees; Yuhuda katamatikka ufayssan homboceettes.

¹² Xiyoone yuushon hemettite; izi gimbeta yuushon yaanne haa simerettite; izi shakkota qoodite.

¹³ Yiza yeletas yootana mala, izi aaho gimbeza akeekitenne izi miixata xomosite.

¹⁴ Intte, «Meri mernaas ha Xoossay nu Xoossa; nu hayqqana gakkanaas izi nuna kaaleththana» giidi yootite.