ዬ ማጻፋ 45 - Geeshsha Maxaafa

Ciishshata Giigiso Geetettiza Yeththan Qoore Nayti Zammareta Kaabbos Yexxida Mazamure

¹ Ta wozinappe lo7o qofay pulttees; ta giigsida ginxoza kawoza sissana; ta inxarsayka eranchcha xaafe bi7ire mala.

² Asa ubbaafe neni keeha lo7aasa; ne puulan kumida qaala haasayaasa; hessa gishshas Xoossi nena mernaas anjjides.

³ Wolqqama kawoo! Ne mashsha gixxa; bonchchonne teema may7a.

⁴ Tumateththas, ashketeththasinne xilloteththas ne teemateth may7ada ola xoonanaas sinththe hordofa; ne ushachcha kushey malalisiza miish besso.

⁵ Ne yiishshati qarata; istti kawo morkketa wozina ayfen caddana; kawoteththati xoonettidi ne toho garsan kundana.

⁶ Abeet Xoossawu! Ne kawoteththa algay mernaas daana; ne kawoteththa guufeykka suureteththa guufe.

⁷ Neni xilloteth dosaasa; makkallateth ixxaasa. Hessa gishshas Xoossay, ne Xoossay ne laggetapekka aaththidi nena ufayssa zayten tiydes.

⁸ Karbbefe, godare uuththafenne Burgudeppe oosettida shitton ne may7oy cacafettidi sawo tunnu gees; Danggarsa zaalen alleqettida ne kawoteththa keeththan diixettiza diiththaynne maasinqoy nena ufayssees.

⁹ Kawoteththa keeththan diza maccassata giddon kawota macca nayti deettes; godatteya geeshsha worqqan alleqettada neeppe ushachcha baggan eqqadus.

¹⁰ Ta nayee, ezga siya; ne hayththa haa yegga. Ne deraanne ne aawaa keeththa doga.

¹¹ Ne medha lo7oy kawo wozina ekkides; izi nees goda gidida gishshas ne iza bonchcha.

¹² Xiroose asay izis imota ekki yaana; dureti nena aadashana.

¹³ Kawaa naya kawo keeththa giddon ay mala lo7azee! Izi may7oyka worqqan alleqides.

¹⁴ Ba alleqo may7oza may7ada kawozaakko bawus; izi lagge gidida geela7oti izo azhabi izas ekki yida.

¹⁵ Istti ufayettishenne hombocishe yiidi kawoza keeth geleettes.

¹⁶ Kawoo! Ne nayti ne aawata soho laattana; neni istta biitta ubbaa bollan shuumana.

¹⁷ Tani ne sunththi yeleta ubbaan hassa7ettana mala ooththana. Hessa gishshas asay mernaas nena sabbana.