ዬ ማጻፋ 44 - Geeshsha Maxaafa

Zammareta Kaabbos Qoore Nayti Hassa7an Shiishshida Ginxo

¹ Abeet Xoossawu! Beni aadhdhida wode ne ooththida gita miishshaa nuni siyidos; nu aawata wodekka ne ooththidayssa istti nuus yootida.

² Kawoteththata neni ne kushen goodda kessadasa; nu aawata istta biittan tokkadasa; deraa liiqisadasa; gido attiin ne kawoteththata aassadasa.

³ Istti bantta mashshan olidi he biitta oykkibeettenna; istti xooniday ba qese minoteththan gidenna. Gido attiin neni isttan ufayettida gishshas ne ushachcha kushey, ne qeseynne ne sinththa poo7o wolqqay hessa ooththides.

⁴ Ta Xoossawu ta kawoy nena; Yaaqoobe zereththaas xoono immiday Xoosso nena.

⁵ Nenan gididi nu morkketa nu oli xoonana; ne sunththan nunara eqettizayta nuni yedhdhana.

⁶ Tani ta tooran ammanettike; ta giththa mashshayka tana ashshenna.

⁷ Gido attiin neni nuna nu morkketappe ashshaasa; qasse nuna ixxizayta neni kawushshaasa.

⁸ Nuni ubba wode Xoossan ceeqettoos; ne sunththaaka mernaas sabboos.

⁹ Ha7i gidikko ne nuna aggadasa; qasseka kawushshadasa; neni nu olanchchatara issife kezizayssa aggadasa.

¹⁰ Nu morkketa sinththafe nuna baqatissadasa; nunara eqettizayti nu aqota bonqqida.

¹¹ Neni nuna dorsata mala shukas aaththa immadasa; qasse kawoteththata giddon nuna laalladasa.

¹² Neni ne asaa hiraysson bayzadasa; gido attiin wodhe demmabeekka.

¹³ Neni nuna nu shoorotas cashshas, qasse nu heeran dizaytas qidhessinne miichchas kessadasa.

¹⁴ Neni nuna kawoteththata giddon haysi7es kessadasa; istti bantta hu7e nu bolla qaaththi qaaththi qidhana mala ooththadasa.

¹⁵ Ta ubba wode kawuyadis; ta sinththi yeella may7ides.

¹⁶ He ubbay tana gakkiday ta morkketi ta bolla halo kessishin harati kadhidi miiccida gishshassa.

¹⁷ Nuni nena dogontta dishin woykko ne caaqo qaala pacinchchontta dishin hayssi ubbay nu bollan gakkides.

¹⁸ Nu wozinay neeppe guye undudibeenna; nu tohoy ne ogeppe gaxa kezibeenna.

¹⁹ Gido attiin neni nuna menththereththada do7a ogen yeggadasa; girdi gida dhumankka oladasa.

²⁰ Nu Xoossa sunth nuni balidaa gidikko nu kushekka eeqa xoossata woossanaas miccidaakko,

²¹ hayssa eroy Xoos xoonanee? Izi wozinan geemmi diza xuura ubbaa erees

²² Gido attiin ubbaa gallas ne gishshas hayqos aadhdhi imettidos; shukas efiza dorsata malakka qoodettidos.

²³ Abeet Godawu beegga! Ays dhiskay? Denda! Mernaas nuna aggofa.

²⁴ Ne sinththa nuuppe ays genththay? Nu qoheteththanne nu un7eteththa ays dogay?

²⁵ Nuni duge gudullan yegettidos; biitta bollaka porccu gidos.

²⁶ Abeet Godawu, nuna maaddanaas denda! Ne mernaa siiqon nuna wozza.