ዬ ማጻፋ 42 - Geeshsha Maxaafa

Nam7anththo Maxaafa ( Maza 42—72 ) Zammareta Kaabbos Qoore Nayti Hassa7an Shiishshida Ginxo

¹ Wushay pultto haath laamotiza mala, abeet Xoossawu, tanikka nena laamotays.

² «Ta shemppoya tani baada Xoossa sinth beyanay awudeeshshaa?» gaada Xoossa, de7o Xoossa saamettadus.

³ Asay ubbato, «Ne Xoossi awan dizee?» giza wode taas gallassinne omars afunththi quma gidides.

⁴ Ta wozinaya ceeceththan giddora seerashe haytantta akeekadus; daro wode ta Xoossa keeth kaaleththashe ililisaninne galata yeththan ba7aale bonchchana shiiqida daro asa giddora ta waana bizaakko aamusadis.

⁵ Tani ays hidota qanxxazinaa? Qasse ays ceecazinaa? Tani Xoossan ammanettays; tana ashshiza ta Xoossaa ta buro galatana.

⁶ Ta Xoossawu! Ta Wozinaya ceecadus; hessa gishshas tani Yordaanoose biittan Hermoone zumbulla Mizaare zuma bolla eqqada nena ta qoppana.

⁷ Ne piissa guunththan ciimmay ciimmas ankees; qasse ne dambalaynne ne carko ubbay ta bollara aadhdhides.

⁸ GODAY ba mernaa siiqo gallas taas kiittees. Tanikka omars izas galata mazamure shiishshays; hessika ta de7o Xoossas shiishshiza woosa.

⁹ Ta Xoossawu taas Zaallawu! «Ne tana ays dogadii? Ta morkketi tana qohishin ta ceecashe ays de7oo?» gays.

¹⁰ Ta morkketi tana ubba wode, «Ne Xoossay awan dizee?» giidi yo7on tana caddeettes; meqeththika menththi cayeettes.

¹¹ Tani ays hidota qanxxazinaa? Qasse ays ceecazinaa? Tani Xoossan ammanettays; tana ashshiza ta Xoossaa ta buro galatana.