ዬ ማጻፋ 41 - Geeshsha Maxaafa

Dawiti Zammareta Kaabbos Yexxida Mazamure

¹ Hiyeesas qoppiza asi anjjettidayssa; meto gallas GODAY iza ashshees.

² GODAY iza naagidi paxa woththees; izikka biitta bolla anjjettana; GODAY iza morkketas iza aaththidi immenna.

³ GODAY izi hargettidi hiixan dishin maaddees; sakettinkka iza paththees.

⁴ Tani gidikko, «Abeet GODAWU! tani nena qohida gishshas tana maara; hargefe tana paththa» gadis.

⁵ Ta morkketi ta bolla iita miish haasaydi, «Izi awude hayqqandeeshaa? Qasse iza sunththayka awude dhayandeeshaa?» geettes.

⁶ Tana beyanawu yiza oonikka ba wozinan iita miish suuththishe qoodheppe qommon haasayees; kare kezidikka zigirs punnees.

⁷ Tana ixxiza ubbati zuppetidi ta bollan saasuketteettes; iita miishshi ta bolla gakkana mala amotteettes.

⁸ «Iza iita hargey oykkides; izi he ichchidasoppe mulekka dendenna» geettes.

⁹ Haray attiin tani ammanettiza ta siiqo laggey, tanara issi maaddafe miday ta bolla toho denththides.

¹⁰ Gido attiin abeet GODAWU! Neni tana maara; tani halo kessana mala tana hargefe paththa.

¹¹ Ta morkkey tana xoononttayssan ne tana dosizayssa ta erays.

¹² Neni tana ta suureteththa gishshas maaddaasa; ne sinththan tana mernaas woththaasa.

¹³ GODAA Isra7eele Xoossay mernaappe mernaa gakkanawu galatetto. Amiin! Amiin!