ዬ ማጻፋ 40 - Geeshsha Maxaafa

Dawiti Zammareta Kaabbos Yexxida Mazamure

¹ Tani GODAA dandayan naagadis; izi taakko simmidi ta woosaa siyides.

² Ciimma ollafe, mittiza urqqafe tana kessides; ta tohota zaalla bolla essides; qasse ta hemeththa minththides.

³ Izi ta doonan ooraththa mazamure woththides; he yeththay, «Nu Xoossay galatetto» gizaaza. Daroti be7idi yayyananne GODAAN ammanettana.

⁴ GODAAN ammanettizay, otoranchchatakko simmonttay, wordanchchatakko xeellonttay anjjettidaade.

⁵ Abeet ta GODAWU! Neni daro malalisiza ooso ooththadasa; nenara likkettizay ooninne baawa! Neni nuus qoppida lo7o qofa ooninne qoodanawu dandayenna; hessi tani yootiin wurizaaz gidenna.

⁶ Neni yarshonne muxuwaata koyabeekka; xuuggiza yarshonne nagara yarshoka neni saamottabeekka; gido attiin siyana mala taas hayththata doyadasa.

⁷ Hessafe guye tani, «Xaaththa maxaafan ta gishshas xaafettida mala hekko ha7i tani yadis.

⁸ Abeet ta Xoossawu! Tani neni koyzayssa ooththanaas dosays; ne wogay ta wozina giddon dees» gadis.

⁹ Gita shiiqon tani xilloteththa mishiraachcho awajjadis. Abeet GODAWU! Neni eriza malakka tani ta doonan yootizayssa aggike.

¹⁰ Tani ne xilloteththa ta wozinan qottabeekke; neni ammanettizayssanne ashshizayssa ta yootadis. Qasse ne siiqonne ne tumateththa gita shiiqozappe genththabeekke.

¹¹ Abeet GODAWU! Ne maaroteththaa taappe haassofa; ne siiqoynne ne tumateththay tana ubba wode naago.

¹² Ays giikko qooday baynda iita miishshi tana dooddides; ta iitateththi darida gishshas ta xeellanawu dandaykke. Ta iita oosoy ta hu7e binanappe darides; ta wozinay ta giddon seerides.

¹³ Abeet GODAWU! Tana ashsha; abeet GODAWU! Tana maaddanaas eesota.

¹⁴ Tana wodhanawu koyzayti mulekka yeellatettonne kawuyetto; tani qohettanayssa amottizayti kawuyidi guye simmetto.

¹⁵ Ta bolla, «Izas hashshu! Hashshu!» gidayti, ba hu7es yeellan dagammetto.

¹⁶ Gido attiin nena koyza ubbati nenan ufayetettonne hashshu getto; ne atoteththaa dosiza ubbati, «GODAY gitato!» getto.

¹⁷ Tani hiyeesanne metotanchcha; Goday taas qoppees; tana maaddizaynne ashshizay nena; abeet ta Xoossawu tana eeson maadda.