ዬ ማጻፋ 39 - Geeshsha Maxaafa

Dawiti Zammareta Kaabbo Edotaanes Yexxida Mazamure

¹ Tani, «Inxarsan nagara ooththontta mala tani ta oge naagana; iita asati ta sinththan diza wode ta doona gordana» gadis.

² Tani duude mala co7u gadis; haray attoshin lo7o miish haasayanaappeka co7u gadis; gido attiin ta waayey haa darides.

³ Ta wozinay qofan seellides; ta yuushsha qoppishin tama mala eexxi kezides. Histtiin tani haasaya doommadis.

⁴ «Abeet GODAWU! Ta de7o wurseththanne taas de7anaas attida gallassata tana bessa. Qasse ta daana layththay ay keena qaanththako tana erisa.

⁵ Neni ta layththa qii tadhdhako keena kessadasa; ta layththi ne sinththan qoodan baynda mala; tumappe asi ubbay issito aadhdhi biza carko mala.

⁶ Tumappe asa duussi eesho mala; coo mela hada haaro shiishon daaburees; gido attiin ooni ekkanaakko erenna.

⁷ «Abeet Godawu! Neeppe attiin hara oonakko xeelloo? Ta hidotay nenana.

⁸ Ta mooro ubbaafe tana ashsha; eeyata miichchas tana kessofa.

⁹ Hayssa ubbaa ooththiday nena gidida gishshas tani co7u gaana; doonakka pogikke.

¹⁰ Ne boshaa ta bollafe denththa; Ne wolqqama shochcha gaason ta daaburadis.

¹¹ Neni as iza nagara gishshas seeraasanne muraasa; izas diza al7o miish bada mala ne wursaasa; tumappe asi ubbay issito carki aadhdhiza carko mala.

¹² «Abeet GODAWU! Ta woosa siya; tana maaddanaas ta waasoza ezga. Ta afunththaa co7u gooppa; tani kase ta aawata ubbaa mala bete asinne imath gidada ne keeththan days.

¹³ Tani guye simma yaanaas dandayonttaso baanaappe kase guuththa wode ufayettana mala tana aggaasharkkii!» gadis.