ዬ ማጻፋ 37 - Geeshsha Maxaafa

Dawite Mazamure

¹ Iita ooththizayta be7ada yiillotoppa; nagara ooththizayta qanaatoppa.

² Ays giikko istti maata mala eeson melana; boncco mala istti shullidi qokkana.

³ Neni GODAAN ammanetta; lo7o oosokka ooththa; histtiko neni biitta bolla palahin daana.

⁴ GODAAN ufayetta; izi nees ne wozina amo immana.

⁵ Ne oge GODAAS hadara imma; izan ammanetta; izikka nees ooththana.

⁶ Izi ne xilloteththa maalado xalqqe mala kessana; ne yo7oza pirdaaka seeta gallassa awa mala poo7isana.

⁷ GODAA sinththan co7u gaada izi ooththana gakkanaas dandayan naaga; iita asati duretikkonne istta qofay polettiko ne istta bolla yiillotoppa.

⁸ Hanqo agga; yiillofe baqata. Yiillotoppa; ays giikko hessi as meton yeggees.

⁹ Iita ooththizayti dhoqalletti dhayana; gido attiin GODAAN hidota ooththizayti biitta laattana.

¹⁰ Iita ooththizayti guuththa wodeppe guye de7ettenna; neni istta koyidaakkoka istti beettettenna.

¹¹ Gido attiin ashketi biitta laattana; istti gita saroteththan ufayetti daana.

¹² Iita asati xillota bolla maqetteettessinne ba ach garcceettes.

¹³ Gido attiin Goday iitata bollan miiccees; ays giikko istti dhayana gallassay gakkidayssa izi erees.

¹⁴ Iita asati hiyeesatanne metotanchchata dhayssanawu, suureteththan hemettizayta wodhanawu bantta mashsha shoddeettessinne bantta wondafeza dafeettes.

¹⁵ Gido attiin istta mashshay isttas wozina ayfen gelana; istta wondafeykka meqqana.

¹⁶ Xillos de7iza guuththay iita asatas diza daro aqotappe aadhdhees.

¹⁷ Ays giikko iitata wolqqay meqqana; xillota gidikko GODAY minththeththees.

¹⁸ GODAY Suure asatau ubbaa gallas naagees; istta laataykka mernaas isttas gidana.

¹⁹ Iita woden suure asati yeellatettenna; kosha layth istti kalli maana.

²⁰ Iita asati gidikko hayqqana; GODAA morkketi bazzo ciishsha mala qokkana; cuwa malakka coo dhayana.

²¹ Iita asi tal7i ekkidi zaari erenna; gido attiin xillo asi qadhettidi gede immees.

²² GODAAN anjjettidayti biitta laattana; gido attiin izi qanggidayti coo dhayana.

²³ Asa ogey GODAA ufayssiko GODAY izaade tanggo kaaleththeessinne minththees.

²⁴ Izi dhuphettikokka kundontta mala GODAY ba kushen oykki ashshees.

²⁵ Tani kase yelaga shin ha7i cimadis; gido attiin xillo asi coo yegetti attishin, woykko iza zereththi kath woossi mishin tani mulekka be7a erikke.

²⁶ Izi ubba wodekka kiyateth immees; dichchi baynda tal7ees; iza zaretikka anjjos gidana.

²⁷ Iitappe haakka; lo7o miish ooththa. Histtiko ne adussa layth de7ana.

²⁸ Ays giikko GODAY xilloteth dosees. Xoossay baas ammanettida asata yeggenna; izi istta mernaaskka naagana. Gido attiin iitata zereththati dhoommana.

²⁹ Xilloti biittayo laattana; izin mernaas de7ana.

³⁰ Xillo asa doonay aadho erateth yootees; iza inxarsika xillo haasayees.

³¹ Iza Xoossa wogay iza wozinan dees; iza tohoykka harchchenna.

³² Iita asi xillo as iita ayfen xeelleessinne wodhanawukka koyi kaallees.

³³ Gido attiin GODAY xillo as iza kushen yeggenna; pirdas eqqiza wodekka iza aaththi immenna.

³⁴ GODAA hidota ooththa; iza azazokka naaga; izi nena biitta laatissana; zaaridikka bonchchana; iita asati dhoommi dhayshin ne beyana.

³⁵ Tani issi menxe iita asi wola mala daayidayssa beyadis.

³⁶ Gido attiin tani he sohora simmada kanththiza wode izi dhaydes; ta koyiinkka izi beettibeenna.

³⁷ Ane lo7o as akeeka; suure as be7a; saro asas wurseththi lo7o gidana.

³⁸ Gido attiin nagaranchchati mulera dhayana; istti wurseththan dhoommana.

³⁹ Xillotas atoteththi GODAAPPE yees; meto wode izi isttas geemmizaso.

⁴⁰ Xilloti GODAA guye aadhdhida; hessa gishshas izi istta maaddeessinne ashshees; iitata kusheppeka woththi ekkees.