ዬ ማጻፋ 36 - Geeshsha Maxaafa

Godaa Oosanchcha Dawiti Zammareta Kaabbos Yexxida Mazamure

¹ Iita asi ba wozinan gene qoppees; iza giddon Xoossas yashshateththi deenna.

² Iza nagaray qoncciin ixxontta mala izi barkka bana baleththees

³ Iza doonappe ke7iza haasayay genenne wordo; aadho erateththinne lo7o ooso mulekka aggides.

⁴ Izi ba hiixan dishe gene qoppishe aqees; bana lo7o gidontta oge kaaleththees; iita izi ixxenna.

⁵ Abeet GODAWU! Ne mernaa siiqoy salo gakkees; ne tumateththayka bolla shaara mala dhoqqees.

⁶ Abeet GODAWU! Ne xilloteththay ubbaafe dhoqqa zumata mala; ne pirdayka ubbaafe ziqqa ciimma mala; neni asaakka do7aakka iitappe naagaasa.

⁷ Abeet Xoossawu! Ne mernaa siiqoy ay keena al7o! Asay ne qefe giddon geemmi attees.

⁸ Istti neson kumida maaddafe miidi kaalleettes; neni ne anjjo shaafappe istta ushshaasa.

⁹ Ays giikko de7o pulttoy ne achchan dees; ne poo7on nuni poo7o be7oos.

¹⁰ Nena erizaytas ne mernaa siiqoza aggofa; suuretas ne kiyateth diggofa.

¹¹ Otoranchchata tohoy tana yedhdhofo; nagaranchchata kushey tana yedeththofo.

¹² Iita asati kundidayssa be7ite; istti kundida; dendanawukka dandayettenna.