ዬ ማጻፋ 34 - Geeshsha Maxaafa

Kawo Abimelekke Sinththafe Atti Bida Wode Dawiti Yexxida Mazamure

¹ Tani GODAA ubba wode galatana; iza galatay ay wodenkka ta doonappe paccenna.

² Tani GODAAN ceeqettays; naaqettidayti hessa siyidi ufayetetto.

³ Ane tanara issife GODAA bonchchoos; iza sunththaaka dhoqqu dhoqqu ooththoos.

⁴ Tani GODAA koyadis; izikka taas zaarides; tani yayyiza miish ubbaafe tana ashshides.

⁵ Izakko xeelliza ubbaa sinththay poo7ees; istti mulekka yeellatettenna.

⁶ Ha hiyeesay waassides; GODAY iza waasoza siyides; meto ubbaafe iza ashshides.

⁷ GODAA kiitanchchay GODAAS yayyizayta naagees; izi istta yuushozan gididi istta ashshees.

⁸ GODAY kiya gididayssa yuushshi qopite; izakko shiiqiday anjjettidaade.

⁹ Intteno geeshsha asatoo! GODAAS yayyite; ays giikko izas yayyiza ubbatas aykkoyka paccenna.

¹⁰ Gaammoti mizaazi dhayiin koshatteettes; GODAA koyzaytas gidikko lo7o miishshi aykkoka paccenna.

¹¹ Naytoo! Haa yiite; ta gizaaz siyite; tani inttena GODAAS yashshateth tamaarsana.

¹² Adussa layth daanaas dosizaynne lo7o miish beyanaas koyzay oonee?

¹³ Ne inxarsaa iita haasayontta mala naaga; ne doonappe wordoy kezontta mala naagetta.

¹⁴ Iitappe shaaketta; lo7o miish ooththa; saroteth koyada kaalla.

¹⁵ GODAA ayfey xillotakko xeellees; qasse iza hayththi istta woosa ezgees.

¹⁶ Istta hassa7issiza miish biittafe dhayssana mala, GODAY iita ooththizayta ba hanqo ayfen xeellees.

¹⁷ Xilloti waasseettes; GODAY istta waaso siyees; izikka istta meto ubbaafe ashshees.

¹⁸ GODAY wozinay meqqidaytas matan dees; qasse hidota qanxxidaytakka ashshees.

¹⁹ Xillo as gakkiza metoy daro; gido attiin GODAY iza he ubbaafe ashshees.

²⁰ GODAY iza minththi naagees; iza meqeththatappe issoyka meqqenna.

²¹ Iitata istta iitateththi wodhana; xillota ixxizayti pirdettana.

²² GODAY ba oosanchchata ashshees; izakko baqatida ooninne pirdettenna.