ዬ ማጻፋ 33 - Geeshsha Maxaafa

¹ Intteno xillotoo! GODAAN ufayettite; suure asati ufayssan ililite.

² Maasinqo shocishe GODAA galatite; tammu shayan waaxettida diiththan izas yexxite.

³ Ooraththa mazamure izas yexxite; diiththaa giigsi shocite; ufayssan ilili giite.

⁴ GODAA qaalay tuma; izi ooththiza ooso ubbay ammanettizayssa.

⁵ GODAY xilloteththanne tuma pirda dosees; iza kiyateththi sa7a kumides.

⁶ Saloti GODAA qaalan medhettida. Iza doonappe keziza peenon salon diza medheteththati medhettida.

⁷ Gita abba haaththa izi issison shiishshides; ciimma haaththa minjjason eelissides.

⁸ Sa7an diza asi ubbay GODAAS yayyo; salo gufanththoy GODAA bonchcho.

⁹ Ays giikko izi haasayiin handes; izi azaziin minnidi eqqides.

¹⁰ GODAY kawoteththata halchcho laallana; istta qofaakka hada ooththana.

¹¹ GODAA halchchoy mernaas eqqi daana; iza wozina qofaykka yeletappe yeleta gakkanawu daana.

¹² Xoossi izas GODAA gidida kawoteththay, izi baas doorida derey anjjettida dere.

¹³ GODAY salon uttidi duge xeellees; asaa ubbaaka be7ees.

¹⁴ GODAY ba araatan uttidi sa7an de7iza ubbaa xeellees.

¹⁵ Izi ubbaa wozina medhdhides; istti ooththiza miish ubbaa erees.

¹⁶ Kawoy ba wottadara corateththan attenna; olanchchay ba wolqqa minoteththan kessi ekkenna.

¹⁷ Tani paran xoonana gi naagoy hada; izi ba wolqqa minoteththan oonakka ashshanawu dandayenna.

¹⁸ GODAA ayfeti izas yayyizaytanne iza mernaa siiqo hidota ooththiza asata xeellees.

¹⁹ Izi hessan istta hayqoppe ashshees; kosha wodekka istta shemppora paxa woththees.

²⁰ Nu shemppoya GODAA hidota ooththawus; izi nuus maadonne gondalle.

²¹ Nuni geesh gidida iza sunththan ammanettoos; nu wozinaykka izan ufayettees.

²² Abeet GODAWU! Nuni nenan hidota ooththizayssa mala mernaa ne siiqoy nunara gido.