ዬ ማጻፋ 32 - Geeshsha Maxaafa

Dawiti Hassa7an Shiishshida Ginxo

¹ Iza mooroy atto geetettidayssinne iza nagaray kamettiday anjjettidayssa.

² GODAY iza nagara qoodonttaadeynne iza qofan baleththoy baynday anjjettidayssa.

³ Tani ta nagara paaxontta dashe gallas kumeth ceeciin ta asateththay daaburdes.

⁴ Gallassinne qamma ne kushey ta bolla deexxides; haaththi bone awan micciza mala ta wolqqay cingi wurides.

⁵ Tani ta nagara nees paaxadis; ta qohidayssa neeppe genththabeekke; «Ta mooroza GODAAS paaxana» gadis. Histtiin ne ta nagara ubbaa atto gadasa.

⁶ Hessa gishshas xillo asi neni beettiza wode nena woosso; di7oy izi diza heera meecci efikkoka iza bochchenna.

⁷ Neni taas qotettizaso; neni tana metoppe naagaasa; tana xoono yeththan kunththadasa.

⁸ GODAY, «Tani nena tamaarsana; neni baanaas bessiza ogekka nena erisana; tani nena zorananne naagana.

⁹ Bixalaninne puulon haarettiza akeekay baynda baqulo mala woykko para mala intte hanopite» gees.

¹⁰ Iitatas tuggay daro; gido attiin GODAAN ammanettizayta maaroteththi dooddees.

¹¹ Intteno xillotoo! GODAAN ufayettitenne «Hashshu!» giite; intteno wozina suuretoo! Ufayssan ililite!