ዬ ማጻፋ 31 - Geeshsha Maxaafa

Dawiti Zammareta Kaabbos Yexxida Mazamure

¹ Abeet GODAWU! Ne taas kuwa gidana mala ta neekko yadis; aydekka tana yeellasoppa; ne xilloteththan tana ashsha.

² Ne hayththa taakko zaara; eeson tana ashsha; neni tana genththiza zaalla gida; tana ashshiza mino miixa taas gida.

³ Ee, neni taas zaalla; ta izan gela attiza miixa; ne sunththa gishshas tani baana oge bessanne kaaleththa.

⁴ Neni taas zemppo gidiza gishshas, istti taas waaxi woththida narxafe tana ne naaga.

⁵ Abeet GODAWU tumu Xoossawu! tani ta shemppo ne kushen hadara immays; neni tana wozza.

⁶ Paththontta eeqatas goynnizayta tani ixxays; tani gidikko GODAAN ammanettays.

⁷ Ta meto neni be7ida gishshassinne ta tuggaa neni erida gishshas tani ne siiqon ufayettays.

⁸ Neni tana ta morkketas aaththa aaththa immabeekka; ta tohotakka aaho sohon essadasa.

⁹ Abeet GODAWU! Tani meton geladis; taas qadhetta. Tani daro mishettadis; ta ayfey, ta ashoynne ta shemppoy daaburdes.

¹⁰ Ta shemppoya waayen daaburadus; ta layththayka ceecen wurides. Meto daron ta wolqqay cingides; ta meqeththatikka giddon seerida.

¹¹ Ta morkketa ubbaas tani qidhe miish gidadis; ta shoorotas miires attadis; tana erizaytas kadhes gidadis; ogen tana be7idaytikka taappe baqateettes.

¹² Tani hayqqida asa mala dogettadis; mooho oto mala gidadis.

¹³ Tani daroti saasukettishin siyadis; dagamay Ubbasora dees; istti ta bolla genen duulateettes; tana wodhanawukka maqetteettes.

¹⁴ Gido attiin GODAWU! Tani nenan ammanettada, «Neni ta Xoossa» gays.

¹⁵ Ta de7o layththay ne kushenna; tana gooddiza ta morkketa kusheppe ne tana ashsha.

¹⁶ Ne aylleza bolla ne sinththa poo7isa; ne maaroteththan tana ashsha.

¹⁷ Abeet GODAWU! Tani nena xeygays; tana yeellasoppa; iitati gidikko yeellatetto; duge duufon gelidi sirphi getto.

¹⁸ Xilloza bolla otoron, kadheninne xalateththan haasayza gishshas wordanchchata doona duudisa.

¹⁹ Nenan zemppanaas neekko shiiqidaytassinne nees yayyizaytas neni asaa sinththan isttas immana gaada minjja woththida kiyateththi ay mala daroo!

²⁰ Neni istta ne keeththan genththada asaa maqqofe ashshaasa; neni istta ne dizason qottada iita inxarsafe naagaasa.

²¹ Tani morkkey dooddi oykkida katamaa giddon diza wode izi malalisiza ba maaroteth tana bessida gishshas GODAY galatetto.

²² Tani dagammada, «Ne sinththafe kichchadis» gadis. Gido attiin tana maaddana mala nena ta xeygida wode ta waasoza neni siyadasa.

²³ Intteno Xoossa asatoo! GODAA siiqite. GODAY izan ammanettizayta naagees; gido attiin otoranchchatas isttas bessiza qixaate immees.

²⁴ Intte hidota GODAAN ooththidaytoo! Beeggitenne minnite.