ዬ ማጻፋ 30 - Geeshsha Maxaafa

Keeththa Anjjisos Yexettida Dawite Mazamure

¹ Abeet GODAWU! Neni tana ciimmafe kessadasa; ta morkketi ta bolla ufayettontta mala ooththadasa; hessas ta nena dhoqqu dhoqqu histtays.

² Abeet ta GODAWU! Neni tana maaddana mala ta neekko waassadis; nekka tana paththadasa.

³ Abeet GODAWU! Tana duufon bontta mala naagadasa; duge ciimma ollan gelontta mala neni tana ashshadasa.

⁴ Intteno Xoossa asatoo! GODAAS yexxite; iza geeshsha sunththaaka sabbite.

⁵ Iza hanqoy guuththa wodessa, gido attiin iza kiyateththi de7o layth ubbaassa; omars yeekkishe aqikkoka maalado zaway baynda ufays gidees.

⁶ Tani woppan diza wode, «Tani mulekka kokkorikke» gadis.

⁷ Abeet GODAWU! Neni taas kiyida wode, tana gita zuma mala minththa essadasa; gido attiin neni ne sinththaa taappe haraso zaarida wode tani dagammadis.

⁸ Abeet GODAWU! Tani nena xeygadis; tani Godaappe maaroteth woossadis;

⁹ «Ta hayqqiko woykko duufon gelikko ne taappe ay demmanee? Biittan gelida asi nena galati erizee? Ne ammaneteththa haasayi erizee?

¹⁰ Abeet GODAWU! Ta woosa ne siya; taas qadhetta. Abeet GODAWU! Ne taas maado gida» gadis.

¹¹ Ta yeeho yeththan laammadasa. Kayo may7oza taappe qaarada ufayssa may7o tana mayzadasa.

¹² Hessa gishshas tani nena sabbanaappe attiin co7u giikke. Abeet ta GODAWU! Tani nena mernaas galatana.