ዬ ማጻፋ 28 - Geeshsha Maxaafa

Dawite Mazamure

¹ Abeet GODAWU! Ta Zaallawu! Tani nena xeygishin taas sissi ixxofa; ta waassishin ne co7u giikko tani duufon geliza asata mala gidana.

² Ta kusheza ne Geeshsha aqoso miccada woossishinne tana maaddarkki gaada ta waassishin ne siya.

³ Ba wozinan iita qoppishe ba laggetara saroteth haasayza iita ooththizaytara tana isttara gaththa efoppa.

⁴ Ne isttas istta iitateththaa malanne istta ooso mala imma; isttas istta kushe ooso mala zaara; istti ooththida iita oosozas halo kessa.

⁵ Istti GODAA oosos wudu gontta ixxida gishshas, iza kushe oosotas soho immontta aggida gishshas, izi istta laallana; zaaridikka keexxenna.

⁶ Ta woosa siyida gishshas, GODAY galatetto.

⁷ GODAY taas wolqqanne gondalle; ta wozinay izan ammaneettes; hessan tani maadettadis; hessa gishshas ta wozinay izan ufayettees; tani iza yeththan sabbana.

⁸ GODAY ba deraas wolqqa; izi ba tiyda kawoza ashshiza miixa.

⁹ GODAWU! Ne deraa ashsha; nees gidizayta anjja; istta heenththanchchay nena gida; neni istta mernaaskka tookka.