ዬ ማጻፋ 27 - Geeshsha Maxaafa

Dawite Mazamure

¹ GODAY taas poo7onne tana ashshizayssa; histtiin tani oonas yayyanee? GODAY ta shemppoys attiza miixa; histtiin tani oonas babbanee?

² Iita asati, ta morkketinne ta balgaarati tana wodhanawu taakko hordofi yiza wode, istti baas dhuphettidi kundana.

³ Morkke tooray tana dooddizaakkoka ta wozinay yayyenna; olay ta bolla worajjidaakkoka, tani GODAAN ammanettays.

⁴ Tani GODAA issi miish oychchays; hessika tani ta de7o layth ubbaan GODAA keeththan de7anaassa; tani GODAA bonchcho lo7oteththa be7anaassa; iza Keeththankka iza koyashe de7anaassa.

⁵ Hessa gishshas meto gallas izi tana ba dizason genththana; ba dunkaanen tana qotti ashshana; dhoqqa zaalla bollaka izi tana essana.

⁶ He wode tana dooddida ta morkketappe bollara dhoqqu dhoqqu gaana; tani iza Dunkaaneza sinththan ufayssa yarsho yarshana; tani GODAAS diixxananne yexxana.

⁷ Abeet GODAWU! Tani nena xeygiza wode neni taas koya; taas qadhetta; tana siya.

⁸ Neni, «Ta sinththa koyite» gida wode, ta wozinay, «Abeet GODAWU! Eeno; tani ne sinththa koyana» gides.

⁹ Abeet tana ashshiza ta Xoossawu! Neni tana maaddizaade; Ne sinththa taappe genththofa; tana ne aylle hanqettada neeppe haassofa. Tana oloppanne aggofa.

¹⁰ Ta aawaynne ta aaya tana aggikokka GODAY tana shiishshi ekkana.

¹¹ Abeet GODAWU! Ne oge tana tamaarsa; ta morkketa gishshas tana suure ogera kaaleththa.

¹² Wordo markkati ta bolla makkallateththan dendida; hessa gishshas ne tana istta iita amos aaththa immofa.

¹³ Tani shemppora paxa dashe GODAA kiyateth beyanayssa hidota ooththays.

¹⁴ GODAAN ammanetta; minna, hidota qanxxofa, GODAAN ammanetta.