ዬ ማጻፋ 26 - Geeshsha Maxaafa

Dawite Mazamure

¹ Abeet GODAWU! Tani suureteththaninne sidhey baynda nenan ammanetta de7ida gishshas ne taas pirda.

² Abeet GODAWU! Tana paacca; ta qanth pilgga; ta wozina xeella;

³ Ays giikko ne siiqoy ta sinththan dees; tani ne tumateththa ogen hemettays.

⁴ Tani baleththiza asatara issife uttike; lo7o misatiza iitata maabaran gelikke.

⁵ Iita ooththiza asata issifeteththa tani ixxays; kofa asatara issife uttike.

⁶ Abeet GODAWU! Tanan qohoy bayndayssa bessanaas ta kusheza meeccays; histtada yarsho yarshizasoza yuuyays.

⁷ Galata mazamure yexxays; neni ooththida miish ubbaaka yootays.

⁸ Abeet GODAWU! Neni de7iza keeththanne ne bonchchoy aqizasoho tani dosays.

⁹ Tana nagaranchchatara issife pirdofa; as wodhizaytarakka issife ta shemppo dhayssofa.

¹⁰ Istta kushen iita halchchoy dees; qasse istta ushachcha kushey matta7en kumides.

¹¹ Tani gidikko borey baynda duus days; tana wozza; taas qadhetta.

¹² Ta tohoy dembason eqqides; tani derey shiiqidason GODAA galatana.