ዬ ማጻፋ 25 - Geeshsha Maxaafa

Dawite Mazamure

¹ Abeet GODAWU! Ta nena wozinappe woossays.

² Abeet ta Xoossawu! Tani nenan ammanettays; tana yeellasoppa; ta morkketikka ta bolla ceeqettofetto.

³ Nena hidota ooththizayti yeellatettenna; gido attiin gene ooththizayti yeellatana.

⁴ Abeet GODAWU! Tana ne oge bessa; ne geedo kaalo tana tamaarsa.

⁵ Neni tana ashshiza Xoossa; ne tumateththan tana kaaleththanne tamaarsa; ubba wode ta hidotay nena.

⁶ Abeet GODAWU! Beniisofe diza ne qadheteththaanne ne kiyateththa hassa7a.

⁷ Ta yelagateththa nagaranne mooro hassa7oppa; Abeet GODAWU! Ne gita kiyateththa malanne ne lo7eteththa keena tana qoppa;

⁸ GODAY kiyanne suure; hessa gishshas nagaranchchata ba oge tamaarssees.

⁹ Ashketa suure ogera kaaleththees; isttaka ba oge tamaarssees.

¹⁰ GODAA caaqo qaalanne maara naagizaytas iza ogey ubbay kiyanne tuma.

¹¹ Abeet GODAWU! Ta nagaray keehi daro; gidikkoka ne sunththa gishshas atto ga.

¹² GODAAS yayyiza asi oonee? Ne doorada baana ogeza izi nena tamaarsana.

¹³ Izi ubbaa wodekka lo7o duus daana; iza zereththati biitta laattana.

¹⁴ GODAY bana yayyizaytappe ba xuura qottenna; izi isttas ba gelida caaqo qaalakka erisees.

¹⁵ GODAY ta toho narxafe kessi ekkiza gishshas, ta ayfey maado demmanaas ubba wode izakko xeellees.

¹⁶ GODAWU! Tani bizza dizaadenne qohettida as gidida gishshas, ne haa taakko simma; ne maaroteththaka bessa.

¹⁷ Taas metoy darides; ta metozappe tana neni kessa.

¹⁸ Ta metozanne ta tuggaa neni be7a; Ta nagara ubbaa atto ga.

¹⁹ Ta morkketi ay keena daridaakko ne be7a; istti tana ay mala ixxizaakko ne xeella.

²⁰ Neni tana naaganne ashsha; ta nenan zemppadis; ne tana yeellasoppa.

²¹ Ne taas hidota gidida gishshas suureteththaynne tumateththay tana naago.

²² Abeet Xoossawu! Isra7eele asa meto ubbaafe neni wozza.