ዬ ማጻፋ 22 - Geeshsha Maxaafa

Dawiti Zammareta Kaabbos Yexxida Mazamure

¹ Ta Xoossawu! Ta Xoossawu! Tana ays aggadii? Tana maadda gaada tani waassishin ays siyontta ixxadii? Taappeka ays haakkadii?

² Abeet ta Xoossawu! Gallas kumeth ta neekko waassishin ne siyabeekka; qamma ubbaankka neekko waasoppe shempabeekke.

³ Ne gidikko geeshsha kawo; Isra7eele galatay ne yuushon dees.

⁴ Kase nu aawati nenan ammanettida; nenan ammanettiin ne istta ashshadasa.

⁵ Istti neekko waassiin ashshadasa; nenan ammanettiin istta yeellasabeekka.

⁶ Tani guxune attiin as gidikke; tani asan kadhettidaadenne ixettidaade.

⁷ Tana be7ida ubbati qidheettes; zaaridikka inxars kessi qidheettes; ba qoodhekka ta bolla qaaththeettes.

⁸ Histtidi, «Izi GODAAN ammanettides; ane Xoossi iza ashsho; izi ufayettidaa gidikko ane iza maaddo» geettes.

⁹ Gido attiin ta wogara yelettana mala maaddiday nena; tani ta aayi dhanth dhammishinkka ne taas ammanettaasa.

¹⁰ Tani yelettoosofe doommada nenan diccadis; ta aayey uloppe doommadakka neni ta Xoossa.

¹¹ Metoy taakko mati mati yiza gishshas, tana maaddizaykka baynda gishshas neni taappe haakkofa.

¹² Daro morkketi korma boorata mala tana giddoththida; qayciza Baasaane biitta boorata mala tana dooddida.

¹³ Menththereththi yeggidi xaaggiza gaammo mala ba doona ta bolla doyda.

¹⁴ Tani haaththa mala goggadis; ta meqeththati someppe someppe kolettida. Ta wozinay muqaadda mala ta giddon seerides.

¹⁵ Taas qoodhey kon7a mala melides; ta inxarsay gonggiraththara oykettides; neni tana hayqqida asa mala gudullan baanan yeggadasa.

¹⁶ Kanati tana giddoththida; Iita asati tana dooddi oykkida; Ta kushetanne ta tohota shiishshi dhishkida.

¹⁷ Tani meqeththata qoodana dandayays; ta morkketikka tana phirxi histti xeelleettes.

¹⁸ Ta may7oza gishetti ekkida; ta adussa may7ozan saama yeggida.

¹⁹ Abeet GODAWU! Neni ha7i taappe haakkofa. Abeet ta wolqqawu! Tana maaddanaas eesota.

²⁰ Tana mashshafe ashsha; ta shemppoyo wolqqama kanatappe ashsha.

²¹ Tana gaammota doonappe ashsha; qayciza menththa kacezappe tana naaga.

²² Tani ne sunththa ta ishatas yootana; istti shiiqidasonkka ta nena galatana.

²³ Intteno GODAAS yayyizaytoo, iza galatite! intteno Yaaqoobe zereththatoo! Ubbayka iza bonchchite! intteno Isra7eele zereththatoo! Ubbatikka bonchchon izas yayyite!

²⁴ Izi naaqettidayssa kadhibeenna; metotishin yeggi aadhdhibeenna; ba sinththa izappe genththibeenna; izi maaddarkki gi waassiin iza waaso siyides.

²⁵ Neni ooththida lo7o ooso gishshas, derey shiiqidason galatana; ta adinidayssa nena yayyiza asaa sinththan gaththana.

²⁶ Hiyeesati miidi kallana. GODAA koyzayti iza galatana. Istti mernaas ufayettana.

²⁷ Sa7a gaxa gakkanaas diza asay iza gishshas yuushshi qoppana; GODAAKKO simmana. Asa zere ubbay izas goynnana.

²⁸ Ays giikko maatay izassa; kawoteththay ubbay izas haarettana.

²⁹ Sa7a bolla diza dureti izas goynnana. Bana hayqoppe ashshanawu dandayontta biittan baana asi ubbay iza sinththan gulbatana.

³⁰ Buro yaana yeletay izas ooththana; he yeletay kaalli yiza yeletas Godaa ooso yootana.

³¹ Istti iza xilloteththa gishshas buro yaana yeletas yootana.