ዬ ማጻፋ 21 - Geeshsha Maxaafa

Dawiti Zammareta Kaabbos Yexxida Mazamure

¹ Abeet GODAWU! Kawoy ne immida wolqqa gishshas ufayettees; neni immida xoonon izi keehi hombocees.

² Neni iza wozina amo izas immadasa; qasse izi nena ba doonan oychchidayssa neni diggabeekka.

³ Neni lo7o anjjora iza mokkaasa; geeshsha worqqa kallachcha iza hu7aan goxxisadasa.

⁴ Neni de7o izas immana mala nena woossides; nekka izas de7onne adussa layth immadasa.

⁵ Neni xoono immida gishshas izas bonchchoy darides; gitateththinne teema izas immadasa.

⁶ Neni izas mernaa anjjo immadasa; ne izara duussan iza ufayssadasa.

⁷ Kawozi GODAAN ammaneettes. Ubbaafe Dhoqqa Xoossa kiyateththi izara diza gishshas izi yayyenna.

⁸ Ne kushey ne morkketa ubbaa demmana; ne ushachchay nena ixxizayta oykkana.

⁹ Neni qoncciza wode coocen eexxiza tama mala ne istta xuuggana; GODAY ba hanqoza suulen istta xuuggana; iza tamaykka istta mi dhayssana.

¹⁰ Neni istta nayta biittafe diggana; istta zereththaaka dereppe denththa dhayssana.

¹¹ Ne morkketi ne bolla genen duulateettes; iita miishshika maqetteettes; gido attiin isttas hanenna.

¹² Nekka istta ne wondafeza yiishshan gooddaasa; istti guye simmidi baqatana mala ooththaasa.

¹³ Abeet GODAWU! Ne minoteththay dhoqqu dhoqqu go; ne gita wolqqaa gishshas galata mazamure yexxoos.