ዬ ማጻፋ 19 - Geeshsha Maxaafa

Dawiti Zammareta Kaabbos Yexxida Mazamure

¹ Saloti Xoossa bonchcho yooteettes; salo gufanththoy iza kushe ooso awajjees.

² Issi gallassay hara gallassas hessa yootees; issi qammayka kaalliza qammas erateth qonccisees.

³ Isttas haasayay woykko qaalay baawa; istta cenggurssikka siyettenna.

⁴ Gido attiin istta haasaya cenggurssi sa7a ubbaan laalettana; istta qaalaykka biitta gaxa gakkana. Xoossi arshes salon soho giigsides.

⁵ Arshey mishiray ba keeththafe keziza mala poo7i ke7ees; gaadde woxxiza pilata asa mala ufayettees.

⁶ Arshey kessasoppe wuloso gakkanaas bees; iza seelappe geemmi attana miishshi deenna.

⁷ GODAA wogay suure; shemppo zaari cil7isees; GODAA azazoy ammanettizayssa; akeekay paccidaytas aadho erateth immees.

⁸ GODAA wogay likke; wozina ufayssees. GODAA azazoy geeshsha; ayfe poo7isees.

⁹ GODAAS yashshi geeshshateththa; izi mernaas eqqidi de7ana. GODAA pirday mulera tumanne xillo.

¹⁰ Worqqafenne muuruta worqqafe aadhdhi dosettees; eessafenne eessa ililoppe aadhdhi mal7ees.

¹¹ Qasse tana ne aylleza naagettana mala zorees; ne woga naagoy daro go7ees.

¹² Ba bala demmizay oonee? Abeet GODAWU! Geemmida nagarappe tana geeshsha.

¹³ Tani ne aylley, xalateththan nagara ooththontta mala neni tana naaga. Nagaray tana haaroppo; he wode tani suure gidana; gita mooroppeka geeyana.

¹⁴ Abeet GODAWU! Ta zemppiza wogga zaallawu! Tana wozzida ta Godawu! Ta doonappe ke7iza qaalaynne ta wozina qofay nena ufayssizayssa gido.