ዬ ማጻፋ 18 - Geeshsha Maxaafa

GODAY Sa7oole kusheppenne iza morkketa ubbaa kusheppe ashshida wode GODAA aylle Dawiti zammareta kaabbos GODAA gishshas yexxida mazamure.

¹ Abeet GODAWU! Ne taas wolqqa immida gishshas ta nena siiqays.

² GODAY taas zaalla; tani olappe naagettiza miixa; izi tana ashshizayssa; ta Xoossay tani izan geemetta attiza wogga zaalla. Izi taas gondalle; izi tana ashshiza kace; taas izi mino zemppo.

³ Galatay bessiza GODAA tani xeygays; izi ta morkketappe tana ashshees.

⁴ Hayqo wodoroy tana cuullides; dhayssiza di7oy tana mittides.

⁵ Duufo wodoroy tana qachchides; hayqo woximadey ta sinththan waaxettides.

⁶ Tana metoy un7iin GODAA xeygadis; «Tana maadda» gaada ta Xoossas waassadis; izi ba Keeththan dishe ta cenggurssaa siyides; tani waassida waasoy iza hayththan wodhdhides.

⁷ Xoossi hanqettida gishshas biittay qaaxxides; zumata xaphoy kokkorides.

⁸ Iza sidheppe hanqo cuway cuwattides; iza doonappe miza tama lacoy kezides; iza doonappe xuuggiza bonqoy pulttides.

⁹ Salo phalqidi wodhdhides; he wode iza toho garsara dhippi gida shaaray dees.

¹⁰ Kiruben uttidi paallides; carko qefe ekkidi pude dendi bides.

¹¹ Bana dhuman kammides; iza Dunkaaneza dhippi gida irara shaaray dooddides.

¹² Iza sinththan de7iza gita poo7ozappe shachchinne wolqqanththi ke7ides; dhippi gida shaarakka kanththi ke7ides.

¹³ GODAY dada mala saloppe guummides; Ubbaafe Dhoqqa Xoossay ba cenggurssa sissides; wolqqanththaninne tama lacon qonccides.

¹⁴ Ba wondafeza yiishshaa yeddides; ba morkketakka laallides; wolqqanththa poo7o kiittidi istta yedeththides.

¹⁵ Abeet GODAWU! Neni seerida wodenne ne hanqoy eexxida wode, gita abbati ichchida biittay beettides; qasse sa7a yochchay qonccides.

¹⁶ GODAY bollafe ba kusheza duge yeddidi tana oykkides; ciimma haaththafe tana kessides.

¹⁷ Izi ta bolla wolqqatiza ta morkketappe, tana ixxizaytappe ashshides.

¹⁸ Tana metoy un7ida gallas istti ta bolla dendida; gido attiin GODAY taas zemppo gidides.

¹⁹ Izi tana aaho demban kessides; tanan ufayettida gishshas tana ashshides.

²⁰ Ta xilloteththa mala GODAY taas qanxxides; ta kushe geeshshateththa mala izi taas zaarides.

²¹ Tani GODAA oge kaalladis; tani ta Xoossa aggada iita ooththabeekke.

²² Tani iza woga ubbaa naagadis; iza azazoza polanaappe guye gabeekke.

²³ Tani iza sinththan suure de7adis; tanateththaa nagarappe naagadis.

²⁴ Hessa gishshas GODAY taas ta xilloteththa mala immides; ta kushey iza sinththan geesh gidida mala zaarides.

²⁵ Abeet GODAWU! Ammanettizaytas neni ammanettaasa; suuretas neni suure.

²⁶ Geeshshataskka neni geeshsha; gido attiin geellatas neni geella.

²⁷ Ashketa ne ashshaasa; gido attiin otoranchchata kawushshaasa.

²⁸ Abeet GODAWU! Ne taas xomppaasa; Xoossay neni taas dhuma poo7isaasa.

²⁹ Ne maaddiin tani ta morkketa olays; ta Xoossa wolqqan tani istta gimbe bollara guppa aadhdhays.

³⁰ Xoossa ogey suure; GODAA qaalay ammanettizayssa; Izakko baqatiza ubbatas izi gondalle.

³¹ Xoossafe attiin hara xoossi oonee? nu GODAAPPE attiin hara zaallay oonee?

³² Taas wolqqa immizaynne ta oge saro ooththizay Xoossa.

³³ Izi ta tohota genessa toho mala minththees; tana dhoqqasohotan saroteththan woththees.

³⁴ Izi ta kusheta ola tamaarssees; hessa gishshas tani ta qesen xarqimala birata wondafeza dafada dukkays.

³⁵ Ashshiza ne gondalle taas immadasa. Ne ushachcha kushen tana zemppisadasa; taakko ziqqi gaada tana gitasadasa.

³⁶ Ta oge aassadasa; hessa gishshas ta tohoy handarashibeenna.

³⁷ Ta morkketa tani yedeththa oykkadis; tani istta dhayssana gakkanaas guye simmabeekke.

³⁸ Istti nam7anththo dendontta mala shocadis; ta toho garsankka kundida.

³⁹ Olas tana wolqqa gixissadasa; ta morkketa ta sinththan gulbatissadasa.

⁴⁰ Ta morkketa ta sinththafe guye zaara baqatissadasa; tana ixxizayta tani dhayssadis.

⁴¹ Banttana maaddana mala waassida; gido attiin ooninne istta ashshibeenna. GODAA istti xeygida; gido attiin izi isttas koyibeenna.

⁴² Carkoy pittidi efiza gudulla mala tani istta ooththadis; ogen de7iza urqqa malakka istta yedhettadis.

⁴³ Makkalla asappe tana ashshadasa; ne tana kawoteththata ayssizaade histta shuumadasa; ta erontta derey taas haarettides.

⁴⁴ Tana erontta allaga derey taas azazettees; istti ta goobateththaa siyidi taas ziggeettes.

⁴⁵ Istti yashshan kaha dhayeettes; bantti naagiza miixappe kezidi kokkorishe taakko yeettes.

⁴⁶ GODAY de7o Xoossa! Ta zemppiza wogga zaallay galatetto! Tana ashshida Xoossay dhoqqu dhoqqu go!

⁴⁷ Izi ta halo kessiza Xoossa; kawoteththata taas haarisiza Xoossa.

⁴⁸ Ta morkketappe tana ashshaasa; Abeet GODAWU! Neni ta morkketa bolla tana dhoqqu dhoqqu histtaasa; makkallanchcha asatappe neni tana ashshaasa.

⁴⁹ Hessa gishshas tani nena kawoteththata sinththan galatana; tani ne sunththa yeththan sabbana.

⁵⁰ Xoossi ba kawoththida kawos xoono bolla xoono immees. Ba tiydayssas kiyateththa bessees; Dawitesinne iza zereththatas mernaas hessaththo ooththees.