ዬ ማጻፋ 17 - Geeshsha Maxaafa

Dawite Woosa

¹ Abeet GODAWU! Ta xilloteththan maganniza magana siya; ta waasoza ezga; cimoy baynda woossiza woosaas zaaro imma.

² Taas xilloteththi neeppe yo; tumaa ne ayfey xeello.

³ Neni qamman tana xomosadasa; ta wozina paaccadasa; ne paaccidaa gidikkoka ta bolla aykkoka demmabeekka. Ta inxarsay iita haasaybeenna.

⁴ Tani hara asa mala iita qaala haasaykke; tani ne azazo naagiza gishshas gene oge kaallabeekke.

⁵ Ta tohoti ne ogeppe handarshontta mala ta tanggoy ne ogeppe kare kezibeenna.

⁶ Abeet Xoossawu! Tani woossiin neni siyiza gishshas tani nena woossays; ne hayththa taakko zaarada, tani nees yootizayssa siya.

⁷ Bantta morkketappe baqatizayta ne ushachcha kushezan qottada ashshizayssoo! Ne kiyateththa malalisiza ogera qonccisa.

⁸ Ne ayfe ciro mala tana naaga; ne qefeta giddon tana qotta.

⁹ Un7eththiza iitatappenne dooddi uttida wolqqama morkketa kusheppe ne tana ashsha.

¹⁰ Isttas qadhettiza wozinay baawa; otoro haasaya haasayeettes.

¹¹ Tani bizaso ubbaan istti tana dooddeettes; tana duge biittan kundis yegganaas dereqeettes.

¹² Istti banttas miza miish koyza gaammo mala; woykko geeman zamadi naagiza wodalla gaammo mala.

¹³ Abeet GODAWU! Denda. Ta morkketara eqettada istta shoca; ne mashshan iitatappe tana ashsha.

¹⁴ Abeet GODAWU! Hessa mala asatappe tana qotta; Istta qaaday ha sa7a de7o xalla gidiza asaappe ne kushen tana ashsha; ne mazgaban minjjida qixaateppe istta kalssa; istta naytas daridi tirpo; istta nayta naytaska gidi palaho.

¹⁵ Gido attiin tani xilloteththan ne sinththa beyana; tani beeggiza wode ne bonchcho be7ada alana.