ዬ ማጻፋ 16 - Geeshsha Maxaafa

Dawite Woosa

¹ Abeet GODAWU! Ta baqata attizasoy nena; ne ki7on tana qotta.

² Tani GODAAS, «Neni ta Godaa; neeppe attiin hara lo7oy taas deenna» gadis.

³ Sa7an de7iza geeshshati ay mala bonchchettidaytee! Tani isttan ufayettays.

⁴ Wordo xoossata kaallizayti bantta bolla meto darseettes. Gido attiin tani eeqa xoossatas shukkike; isttas sunththaaka xeygikke.

⁵ GODAWU! Taas laata xinxxoynne qaaday nena;

⁶ Ne taas wadhdhida zaway lo7o gidides; keehippe lo7o xinxxoy tana gakkides.

⁷ Tana zoriza GODAA galatays; omars ta wozinay tana tamaarssees.

⁸ Tani ubbato GODAA sinththasays; izi ta ushachchan diza gishshas tani kokkorikke.

⁹ Hessa gishshas ta wozinay ufayettees; ta shemppoyka woppu gees; ta asateththayka hirgay baynda shempi dees.

¹⁰ Ne tana Si7oolen aggaka; ne geeshshaza wooqqana mala aggaka.

¹¹ Neni tana de7o oge bessaasa; ne matan kumeththa ufayssi, nees ushachchan mernaa ufayssi dees.