ዬ ማጻፋ 148 - Geeshsha Maxaafa

¹ GODAY galatetto! Salon de7izaytoo! GODAA galatite; bolla dhoqqan de7izaytoo! Iza sabbite.

² Intteno iza kiitanchchatoo! Ubbay iza galatite; salon de7iza iza olanchchatoo! Ubbay iza galatite.

³ Arsheynne aginay iza galatite; poo7isiza xoolinttetoo! Ubbay iza galatite.

⁴ Intteno ubbaafe bolla dhoqqan diza salotoo! Iza galatite; Salo gufanththofe bollara diza haaththatoo! Iza sabbite.

⁵ Izi azaziin istti ubbayka medhettida gishshas ubbati GODAA sunththaa galatetto!

⁶ Izi istta istti dizason meri mernaas minththi woththides; Izi isttas laamettontta woga immides.

⁷ Sa7an de7izaytoo! GODAA galatite! Abba giddon diza gita medheteththatinne wogga gita abba ciimmati ubbayka iza sabbite.

⁸ Wolqqanththinne shachchi, kenchchoynne gubbanay, iza azazo poliza gote carkoti ubbatikka iza galatite.

⁹ Zumatoo, zumbullatoo, ayfe ayfiza miththatoo, zigatoo ubbatikka iza galatite.

¹⁰ Mehetoo, do7atoo, sa7ara gooshettiza medhetatoo! Paalliza kafotoo ubbatikka iza galatite.

¹¹ Sa7aa kawotoo, kawoteththatoo! Daannatoo, dere haarizaytoo! Ubbatikka iza galatite.

¹² Panththatoo, geela7otoo, cimatoo, naytoo! Ubbatikka iza galatite.

¹³ Iza sunththi ubbaa bolla dhoqqa; iza bonchchoy sa7appenne saloppe bolla; hessa gishshas hayti ubbay iza sunth galatetto.

¹⁴ Iza bagga gidida Isra7eele asati iza galatana mala izi istta kace kessides. GODAY galatetto!