ዬ ማጻፋ 147 - Geeshsha Maxaafa

¹ GODAY galatetto! Nu Xoossa mazamuren saboy ay mala lo7o! iza galatizayssi ufayssees; hessika izas bessees.

² GODAY Yerusalaame ooraxissana; Isra7eeleppe betidaytakka shiishshana.

³ Wozinay meqqidayta izi koolees; istta madunththaaka izi paththees.

⁴ Izi salo xoolintteta qooda erees; issaa issaa iza sunththan sunththan xeygees.

⁵ Nu GODAY gita; izi keehippe wolqqama; iza erateththaas zaway deenna.

⁶ GODAY kadhettidayta bonchchees; gido attiin iitata kawushshees.

⁷ GODAAS galata mazamure yexxite; nu Xoossas maasinqo shocishe galatite.

⁸ Izi salo shaara mayzees; sa7as ira bukisees; zumata bollaka maata mokisees.

⁹ Medosassinne quuro yelotas miza miish izi immees.

¹⁰ Izi ufayettizay parata wolqqaninne tooranchchata minoteththan gidenna.

¹¹ GODAY baas yayyizaytaninne iza siiqon ammanettizaytan ufayettees.

¹² Yerusalaame katamayee! GODAA galata! Hanne Xiyoonee! Ne Xoossa sabba!

¹³ Izi ne penge kolata minththees; ne giddon diza ne nayta anjjees.

¹⁴ Izi ne zawa saroteththan naagees; nena keehippe lo7iza gistte kalssees.

¹⁵ Izi ba kiita sa7as kiittees; iza qaalaykka eeson gakkees.

¹⁶ Izi shach afala mala miccees; kenchchoka bidinththa mala laallees.

¹⁷ Izi shach shuchcha mala duge yeddana; he moocezan eqqanaas ooninne dandayenna.

¹⁸ Izi ba qaala kiittidi shachchaa mayisees. Izi carko carkissiin haaththi goggees.

¹⁹ Izi ba qaala Yaaqoobe zereththas ba maaraanne wogaa Isra7eele asaas qonccisees.

²⁰ Izi hessa mala hara kawoteththatas ooththibeenna; istti iza woga erettenna. GODAY galatetto!