ዬ ማጻፋ 145 - Geeshsha Maxaafa

Dawiti Yexxida Galata Mazamure

¹ Abeet ta kawo Xoossawu! Tani nena dhoqqu dhoqqu histtana; ne sunththa mernaaskka galatana.

² Tani nena ubba gallas sabbana; ne sunththaaka mernaas galatana.

³ GODAY gita; gita galatay izas bessees; iza gitateththay asa qofappe bolla.

⁴ Issi yeletay kaalliza yeletas ne ooththida ooso yootees; malalisiza ne oosotakka qonccisana.

⁵ Istti ne bonchchonne ne gita teema haasayana; tanikka malalisiza ne oosoza zaara zaara qoppana.

⁶ Asay malalisiza ne oosoza gitateththa gishshas haasayettana; tanikka ne gitateththa awajjana.

⁷ Istti ne kiyateththa daroza yootana; ne xilloteththaa ufayssan yexxana.

⁸ GODAY qadhettizayssanne maarizayssa; izi hanqettanaas eesotonttayssanne siiqoy kumidayssa.

⁹ GODAY ubbaas kiya; izi ba medhdhida ubbaas qadhettizayssa.

¹⁰ Abeet GODAWU! medheta ubbay nena galatana; ne derey ubbayka nena sabbana.

¹¹ Istti ne kawoteththa bonchcho gishshas haasayana; ne wolqqa gishshas yootana.

¹² Hessan ne wolqqama oosotanne ne kawoteththa teema bonchchoza istti erisana.

¹³ Yeletappe yeleta gakkanaas ne haarana; ne kawoteththay mernaassa. GODAY ba gida qaalan ammanettizayssa; izi ba ooso ubbaan kiya.

¹⁴ GODAY gandigarzayta kaafees; kundidaytakka denththees.

¹⁵ Ubbaa ayfey neekko xeellees; isttas koshshiza woden neni isttas quma immaasa.

¹⁶ Neni ne kushe miccada shemppora paxa diza ubbaa amo kunththaasa.

¹⁷ GODAY ba oge ubbaan xillo; izi ba ooso ubbaan kiya.

¹⁸ GODAY bana xeygizaytas ubbaas mata; wozinappe xeygiza ubbaas matan dees.

¹⁹ Izi baas yayyiza ubbaas amo kunththees. Qasse izi istta waasoza siyidi istta ashshees.

²⁰ GODAY bana siiqizayta ubbaa naagees; gido attiin iitata ubbaa dhayssana.

²¹ Tani ta doonan GODAA galatana. Medheta ubbay iza geeshsha sunththa meri mernaas galato!