ዬ ማጻፋ 143 - Geeshsha Maxaafa

Dawite Mazamure

¹ Abeet GODAWU! Ta woosa siya; ta shoobbizayssa ezga; neni xillonne ammanettizayssa gidida gishshas taas zaaro imma.

² Ne sinththan xillo gidana asi oonikka deenna; tana ne aylleza pirdas shiishshofa.

³ Ta hayqqana gakkanaas ta morkketi tana yedeththida; tana dirxxidi biitta gars gelththida; kase hayqqida asata malakka tana dhuman woththida.

⁴ Hessa gishshas tani daaburadis; ta wozinaykka hidota qanxxides.

⁵ Tani beni wodeta hassa7ays; neni ooththida ooso ubbaa yuushsha qoppays; ne kushe oosotakka akeekays.

⁶ Tani ta kusheza neekko miccays; mela biittay haath koyza mala ta shemppoya nena saamettadus.

⁷ Abeet GODAWU! Tani daaburadis; ne taas zaaro immanaas elela! Tani hayqqida asataththo duge duufon gelontta mala ne sinththa taappe genththofa.

⁸ Tani nena ammanettiza gishshas maalado maalado ne siiqo tana bessa; tani ta shemppo nees hadaradis; hessa gishshas ta baana oge tana tamaarsa.

⁹ Abeet GODAWU! Ta ne garsan qotettadis; tana ta morkketappe ashsha.

¹⁰ Neni ta Xoossa; tani ne shene polana mala tana tamaarsa; ne lo7o Ayanay tana suure oge kaaleththo.

¹¹ Abeet GODAWU! Ne sunththa gishshas tana ashsha; ne xilloteththan tana metoppe kessa.

¹² Ne tana siiqiza gishshas ta morkketa suppu histta wodha; tana ne aylleza un7eththizayta dippi histta dhayssa.