ዬ ማጻፋ 140 - Geeshsha Maxaafa

Dawiti Zammareta Kaabbos Yexxida Mazamure

¹ Abeet GODAWU! Iita asatappe tana ashsha; makkallanchchatappeka tana naaga.

² Istti ubba wode iita ooththanaas maqetteettes; ubba gallassika oosh denththanaas yo7o piqqeettes.

³ Istti haso shooshsha mala inxars qaraseettes; istta doonappe goppe marze mala qaalay kezees.

⁴ Abeet GODAWU! iita asata kusheppe tana ashsha; ta toho qaxxanaas qoppiza makkallanchchatappeka tana naaga.

⁵ Otoranchchati taas woximade woththida; gite giigsida; ta ogenkka diiza woththida.

⁶ Tani GODAA, «Neni ta Xoossa» gays. Abeet GODAWU! Tani shoobbizayssa siya.

⁷ Abeet Ubbaafe Wolqqama GODAWU! tana ashshiza minozoo! ola gallas taas gondalle gidadasa!

⁸ Abeet GODAWU! Iitata amoy polettofo; istta qofay polettana mala ooththofa!

⁹ Ta morkketan tana xoonisoppa; istti qoppida iita qofay istta hu7en xaaxetto.

¹⁰ Istta bolla tama bonqoy qoletto; istti taman olettetto; simmi kezanaas dandayontta ollan kundetto.

¹¹ Iita haasayzayta biittay tookkofo; makkallanchchata iita miishshi oykko.

¹² GODAY hiyeesatas pirdizayssanne metotanchchatas mootettizayssa ta erays.

¹³ Xilloti tumuppe ne sunththaa galatana; suuretikka ne sinththan de7ana.