ዬ ማጻፋ 139 - Geeshsha Maxaafa

Dawiti Zammareta Kaabbos Yexxida Mazamure

¹ Abeet GODAWU! Neni tana pilgga eradasa.

² Tani awude uttizaakkonne awude eqqizakko neni eraasa; neni ta qofa ubbaa haakoppe akeekaasa.

³ Tani bizaasonne shempizaso xomosaasa; ta ogeta ubbaa neni eraasa.

⁴ Abeet GODAWU! Tani ta doonappe issi qaalakka haasayanaappe kasetada neni ta qofa ubbaa eraasa.

⁵ Neni ta yuusho ubbaan daasa; ne kushezan tana naagaasa.

⁶ Ne erateththay tana keehippe malalisees; tani akeekanaas dandayzayssafekka dhoqqees.

⁷ Tani ne Ayanappe awa baanaas dandayazinaa? Woykko ne sinththafe awa baqatanaas dandayazinaa?

⁸ Pude salo ke7ikko neni heen daasa! Duge si7oole wodhdhikokka neni heen daasa.

⁹ Arshey mokkizaso bagga paalla biikko, woykko arshey wullizaso bagga haakka biikko,

¹⁰ Tana heen ne kushey kaaleththees; ne ushachcha kusheykka tana minththi oykkees.

¹¹ Tani, «Dhumazoo! Tana genththa; poo7ozoo! Ta yuushon dhuma» giikko,

¹² dhumay nena xeelo diggenna; omarsi nees gallassa mala poo7ees; dhumaynne poo7oy nees issi mala.

¹³ Neni ta asateththa ubbaa medhdhadasa; ta aayey ulonkka tana tila medhdhadasa.

¹⁴ Neni tana keehi yegalththinne malalisizaaz histta medhdhida gishshas ta nena galatays; ne oosoti malalisizayta! Ta shemppoya hessa ubbaa erawus.

¹⁵ Tani geemason medhettida wode ta meqeththati neeppe geemmibeettenna; tani ta aayey ulon ciimma giddon hiillan oosettiza wode,

¹⁶ ta aayi ulon buro suuth gida ta dishin ne ayfeti be7ida; ta layththatappe issoynne doomettontta dishin taas neni barida gallassati ubbay ne mazgaban xaafettida.

¹⁷ Abeet Xoossawu! Ne taas qoppiza qofay ay mala lo7oo! Izikka ay keena coraa!

¹⁸ Tani iza qoodikko aceppeka daro; ta ichcha beeggiza wode ha7ikka nenara de7ays.

¹⁹ Abeet Xoossawu! Neni iitata siifidaakko aazee dizay! Suuth gussana saamettiza asati taappe haakkite!

²⁰ Istti ne bolla iita miish haasayeettes; ne morkketi ne sunththaa mooreettes.

²¹ Abeet GODAWU! Nena ixxizayta tani ixxikinaa? Ne bolla dendizayta tani harassettikinaa?

²² Ta istta mulera ixxays; istta tani ta morkketa mala qoodays.

²³ Abeet Xoossawu! Ta wozina pilggada era; tana paaccada ta ceece qofaakka shaakka era.

²⁴ Ane tanan iitay de7ikko xeella; histtada mernaa ogera tana kaaleththa.