ዬ ማጻፋ 135 - Geeshsha Maxaafa

¹ Intteno GODAA aylletoo! Iza galatite! GODAA sunththa sabbite!

² Intteno GODAA Keeththan ooththizaytoo! Intteno nu Xoossa Keeththa zagon eqqidayto galatite!

³ Izi kiya gidida gishshas GODAA galatite! Izi lo7o gidida gishshas iza sunththaas yexxite!

⁴ GODAY Yaaqoobe baas buzo ooththides; Isra7eelekka baas al7o miish histti doorides.

⁵ GODAY gita gididayssanne nu GODAY xoossata ubbaafe dhoqqizayssa tani erays.

⁶ Saloninne sa7an, abbataninne ciimmata ubbaa giddonkka GODAY ba dosidayssa ubbaa ooththees.

⁷ Kareththa shaara sa7a gaxappe izi denththees; izi irara wolqqanth kiittees; ba minjji woththidasoppe carko kessi yeddees.

⁸ Gibxe biittan asappe biidi mehe gakkanaas bayra yelettida ubbaa wodhides.

⁹ Nenoo Gibxe! Paaroone bollanne iza oosanchchata bolla ooraththinne malalisiza miish yeddides.

¹⁰ Izi daro kawoteththata dhayssides; wolqqama kawotakka wodhides.

¹¹ Amooreta kawo Sihoone, Baasaane kawo Aagenne Kanaane kawota ubbaa wodhides.

¹² Istta biittaaka ba deraa Isra7eele laatissides.

¹³ Abeet GODAWU! Ne sunththi mernaas daana; yeletappe yeleta gakkanaas neni hassa7ettana.

¹⁴ GODAY ba asaas pirdana; izi ba aylletaskka qadhettana.

¹⁵ Kawoteththati goynniza eeqa xoossati birappenne worqqafe asa kushen oosettidayta.

¹⁶ Isttas doonay dees shin haasayettenna; ayfey dees shin xeellettenna.

¹⁷ Hayththi dees shin siyettenna; istta siidhen peenoykka deenna.

¹⁸ Istta medhdhidaytinne isttan ammanettizayti ubbay istta mala gidetto.

¹⁹ Isra7eele derezoo! GODAA galatite; Aaroone keeththa asatoo! GODAA sabbite;

²⁰ Lewe keeththa asatoo! GODAA galatite; GODAAS yayyizaytoo! Ubbay GODAA galatite.

²¹ Yerusalaamen de7iza GODAY Xiyoonen galatetto! GODAY galatetto!