ዬ ማጻፋ 132 - Geeshsha Maxaafa

Pude Kezishe Yexxida Mazamure

¹ Abeet GODAWU! Dawitenne izi dandayda metoza ubbaa ne qoppa.

² GODAWU! Izi nees caaqqida qaala, wolqqama Yaaqoobe Xoossaska adinettida adinaa qoppa.

³ Izikka, «Hayssafe sinththan tani taso gelikke; ta hiixankka kezikke;

⁴ dhiskoka dhiskike; ta ayfetakka liiphikke.

⁵ Hessika tani GODAAS duussaso, wolqqama Yaaqoobe Xoossas aqoso giigsana gakkanaassa» gides.

⁶ Hekko nuni Taabotaza gishshas Efraatan dishe siyidos; Qiriyaate-Yi7aarime biittan iza demmidos.

⁷ Nuni, «Ane izi dizaso boos; iza tohoy yedhdhizason gufannidi izas goynnoos.

⁸ «Abeet GODAWU! Denda! Ne minoteththas malata gidida Taabotaara ne Keeth gelada shempa.

⁹ Ne qeeseti xilloteth may7etto; geesh gidida ne asati ililetto» gidos.

¹⁰ Ne aylle Dawite gishshas gaada neni tiydayssa yeggofa.

¹¹ GODAY Dawites qanththafe caaqqides; laamettontta qaalan, «Ne naytappe issaa tani ne araatan utissana.

¹² Ne nayti ta caaqo qaalanne tani tamaarsida qaala istti naagikko istta naytikka ne kawoteththa araatan mernaas uttana» gi caaqqides.

¹³ GODAY Xiyoono doorides; baas de7izaso ooththanaas amottidi,

¹⁴ «Hanna taas mernaas shempposo gidana; tani izo dosida gishshas izin de7ana.

¹⁵ Tani izo keeha anjjana; izin de7iza manqotakka kath kalssana.

¹⁶ Tani izin diza qeeseta atoteth mayzana; izin de7iza Xoossa asatikka ufayssan yexxana.

¹⁷ «Ha sohon Dawite zereththafe kawo kessana; tani tiydayssas poo7o giigsana.

¹⁸ Tani iza morkketa yeellachchana; gido attiin iza hu7aan de7iza kawoteththa kallachchay phoollana» gides.