ዬ ማጻፋ 118 - Geeshsha Maxaafa

¹ Izi kiyanne iza siiqoy mernaas gidida gishshas GODAA galatite!

² Isra7eele asay, «Iza siiqoy mernaassa» go.

³ Aaroone zereththati, «Iza siiqoy mernaassa» getto.

⁴ GODAAS yayyizayti ubbay, «Iza siiqoy mernaassa» getto.

⁵ Tani un7ettida wode GODAAKKO waassadis; histtiin izi ta waasoza allidi tana un7ofe kessides.

⁶ GODAY tanara diza gishshas tani yayyike. Asi tana ay ooththanee?

⁷ GODAY tana maaddanaas tanara dees; ta morkketa xooneteththaa tani ayfen be7ana.

⁸ Asan ammaneteththafe GODAAN ammaneteththay lo7o.

⁹ Daannatan ammaneteththafe GODAAN ammaneteththay lo7o.

¹⁰ Kawoteththati ubbay tana dooddida; gido attiin GODAA sunththan tani istta xoonadis.

¹¹ Istti tana ubbasora dooddi oykkida; gido attiin GODAA sunththan tani istta xoonadis.

¹² Istti tana maththi dooddiza mala dooddida; gido attiin agunththi eexxiza mala eexxi dhayda; GODAA sunththan tani istta xoonadis.

¹³ Tana sugiin kundanaas gandigaradis; gido attiin GODAY tana maaddides.

¹⁴ GODAY taas minoteththinne yeththa; tana ashshizay iza.

¹⁵ Xillota dunkaane giddon xoono ililisinne ufayssa yeththi, «GODAA ushachcha kushey wolqqama miish ooththides!» gishe seetettees.

¹⁶ GODAA ushachcha kushey dhoqqu dhoqqu gides! GODAA ushachcha kushey wolqqama miish ooththides.

¹⁷ Tani hayqqike shemppora paxa de7ana; GODAY ooththida ooso buroppeka awajjana.

¹⁸ GODAY tana keehi qaxxaydes; gido attiin hayqos aaththi immibeenna.

¹⁹ Tani giddo gelada GODAA galatana mala xilloteththa pengeta ane taas doyte!

²⁰ Hayssi GODAA penge; izara xilloti xalla gelana.

²¹ Neni taas siyida gishshassinne xoono immida gishshas tani nena galatays.

²² Gimbizayti kadhidi ixxida shuchchay gulas hu7en woththiza shuch gidides.

²³ Hayssika GODAA ooso; qasse nu ayfesikka malalisiza miishsha.

²⁴ Hayssi gallassay GODAY ooththida gallassa; ane nuni izan ufayettoossinne ililoos.

²⁵ Abeet GODAWU! Ha7i nuna ashsharkkii! Abeet GODAWU! Ha7i nuus injjesarkkii!

²⁶ GODAA sunththan yiza asi anjjettidayssa gido! Nuni GODAA Keeththan inttena anjjoos.

²⁷ GODAY Xoossa; izi nuus poo7isides; cilila miththa haggata oykkite; yarsho yarshizasoza bolla diza kacetakko gakkanaas kezite; ba7aale bonchchite.

²⁸ Neni ta Xoossa; tani nena galatana; Neni ta Xoossa; tani nena gitasana.

²⁹ Izi kiya gidida gishshas GODAA galatite! Iza siiqoy mernaassa.