ዬ ማጻፋ 116 - Geeshsha Maxaafa

¹ Izi ta shoobba woossiza woosa siyida gishshas tani GODAA dosays.

² Izi ba hayth taakko yeggida gishshas tani de7iza wode ubbaan iza xeygana.

³ Hayqoy woximade mala tana dooddi oykkides; duufon geloy tana hirgisides. Ceeceynne un7oy tana toli oykkides.

⁴ He wode tani, «Abeet GODAWU! Hadara! Tana ashsha» gaada GODAA sunth xeygadis.

⁵ GODAY kiyanne xillo; nu Xoossay maarizayssa.

⁶ GODAY ashketa naagees; tani metotida wode izi tana ashshides.

⁷ Ta shemppoyee ane woppu ga; GODAY nees lo7o miish ooththides.

⁸ GODAY tana hayqoppe, ta ayfe afunththafe, ta tohokka dhupheppe ashshides.

⁹ Hessa gishshas tani GODAA sinththan shemppora paxa dizayta giddon hemettays.

¹⁰ Ta, «Tani keeha un7ettadis» giza wodekka ammano aggabeekke.

¹¹ Taas gizaazi dhayiin, «Asi ubbay wordo» gadis.

¹² Izi taas kiyida kiyateththaa gishshas tani GODAAS ay qanxxanaas dandayazinaa?

¹³ GODAY tana ashshida gishshas woyne ushshu galatas shiishshada iza sunththu xeygana.

¹⁴ Iza deraa ubbaa sinththan tani adinida adina GODAAS gaththana.

¹⁵ Geeshshata hayqoy GODAA sinththan bonchcho.

¹⁶ Abeet GODAWU! Tani ne aylle; tani ne aylley naa; tana qashoppe birshadasa.

¹⁷ Abeet GODAWU! Tani galata yarsho nees yarshana; histtada ne sunththaa xeygana.

¹⁸ Iza deraa ubbaa sinththan tani adinettida adina GODAAS gaththana.

¹⁹ Hessaka tani gaththanay, Yerusalaamen diza GODAA keeththa dabaabanna. GODAY galatetto!