ዬ ማጻፋ 115 - Geeshsha Maxaafa

¹ Abeet GODAWU! Nu gishshas gidontta ne siiqo gishshassinne ne ammaneteththa gishshas ne sunththaa bonchcha.

² Kawoteththati ays, «Istta Xoossi awan dizee?» gizoo?

³ Nu Xoossay salon dees; izi ba dosidayssa ubbaa ooththees.

⁴ Gido attiin istta eeqa xoossati birappenne worqqafe asa kushen oosettidayta.

⁵ Isttas doonay dees shin haasayettenna; ayfeykka dees shin demmettenna.

⁶ Isttas hayththi dees shin siyettenna; siidheykka dees shin singettenna.

⁷ Isttas kushey dees shin bochchettenna; tohoykka dees shin hemettettenna; istta poorandey cenggurs kessenna.

⁸ Istta medhdhizaytinne isttan ammanettizayti ubbay istta mala gidetto.

⁹ Intteno Isra7eele asatoo! GODAAN ammanettite! Izi inttes gondallenne inttena maaddizaade.

¹⁰ Intteno Aaroone zereththatoo! GODAAN ammanettite! Izi inttes gondallenne inttena maaddizaade.

¹¹ Intteno GODAAS yayyizaytoo! GODAAN ammanettite! Izi inttes gondallenne inttena maaddizaade.

¹² GODAY nuus qoppees; izi nuna anjjana; izi Isra7eele asatanne Aaroone zereththatakka anjjana.

¹³ GODAAS yayyizayta ubbaa guuth gidiin gita izi anjjana.

¹⁴ GODAY inttenakka intte naytakka darso!

¹⁵ Salonne sa7a medhdhida GODAY inttena anjjo!

¹⁶ Saloti Xoossassa; gido attiin sa7a asa naytas immides.

¹⁷ Hayqqidi duge duufon gelidayti GODAA galatanaas dandayettenna.

¹⁸ Gido attiin nuni shemppora paxa dizayti hachchife doommidi mernaa gakkanaas GODAA galatana. GODAY galatetto!