ዬ ማጻፋ 114 - Geeshsha Maxaafa

¹ Isra7eele asay Gibxe biittafe kezida wode, Yaaqoobe zereththay allaga qaala haasayza biittafe yeggidi bida wode,

² Yuhuda asay Xoossas geeshsha as gidides; Isra7eele asaykka izas haarettides.

³ Zo7o abbay hessa be7idi baqatides; Yordaanoose shaafaykka guye simmides.

⁴ Zumati dharsho mala guferettida; zumbullatikka dorsa laaqqa mala xikkida.

⁵ Abbazoo! Ne ays baqatadii? Yordaanoose shaafazoo! Ays guye simmadii?

⁶ Intteno zumatoo! Dharsho mala ays guppidetii? Intteno zumbullatoo! Dorsa laaqqa mala ays xikkidetii?

⁷ Hanne biittayee! Godaa sinththan Yaaqoobe Xoossa sinththan kokkora.

⁸ Izi zaalla eele haath kessides; wolqqama zaalla pultto haath kessides.