ዬ ማጻፋ 112 - Geeshsha Maxaafa

¹ GODAY galatetto! GODAAS yayyiza asi, iza azazotakka polanaas ufayettiza asi anjjettidayssa.

² Iza nayti biittan wolqqama gidana; suure asata yeletay anjjettana.

³ Aqotaynne dureteththi iza keeththan dees; iza xilloteththayka mernaas de7ana.

⁴ Kiya, qadhettizanne xillo ooththiza suure asas dhuma giddon poo7oy poo7ees.

⁵ Kiyateththan coo tal7iza asas, ba ooso suureteththan ooththiza asas de7oy injjetana.

⁶ Xillo asi awudenne kundenna; mernaas izi hassa7ettishe de7ana.

⁷ Iita miishshi iza daganththenna; ays giikko iza wozinay hirgenna; GODAAN ammaneettes.

⁸ Iza wozinay mino; mulekka yayyenna; wurseththan ba morkketa kundeth izi be7ana.

⁹ Izi hiyeesatas kiyateththan immees; qasse iza xilloteththay mernaas dees; iza kacey bonchchon dhoqqu dhoqqu gaana.

¹⁰ Iita asi hessa be7idi yiillotees; ba achchaa garccishe coo gilqi dhayees; iitata amoy hada gidana.